सुनको मूल्यमा फेरि कीर्तिमान

काठमाडौँ। सुनको मूल्यमा रेकर्ड बन्ने क्रम जारी छ । मंगलबार पनि सुनको मूल्य हालसम्मकै उच्च भएको छ । नेपाल सुनचाँदी व्यवसायी महासंघले यस दिन भाउ प्रतितोला १ लाख ७९ हजार ७ सय रुपैयाँ तोकेको छ । आजको मूल्य अघिल्लो दिनको तुलनामा १८ सय बढी हो ।

अघिल्लो दिन प्रतितोला १ लाख ७७ हजार ९ सय रुपैयाँमा सुनको कारोबार भएको थियो । गत शुक्रबारदेखि सुनको मूल्यले दैनिक नयाँ रेकर्ड बनाउँदै आएको छ । शुक्रबार प्रतितोला १ लाख ७६ हजार २ सयमा कारोबार भएको सुन आइतबार १ लाख ७६ हजार ८ सय पुग्यो । सोमबार ११ सय बढेर १ लाख ७७ हजार ९ सय पुगेको थियो ।

सुनको भाउ लगातार बढ्नुमा अमेरिकाप्रति अन्य मुलुकहरुको बढ्दो असन्तुष्टि हो । अमेरिकी राष्ट्रपति डोनाल्ड ट्रम्पले एकपछि अर्को गरी अमेरिका आयात हुने वस्तुमा करका दर थोपर्दै गएपछि विभिन्न मुलुकहरु असन्तुष्ट छन् ।