तीनकुने घटनाको सोधपुछका लागि संसदीय समितिमा पूर्वराजालाई बोलाउने

काठमाडौँ। नेपाली कांग्रेसका सांसद जीवन परियारले पूर्वराजा ज्ञानेन्द्र शाहलाई कानुन, न्याय तथा मानव अधिकार समितिमा बोलाएर छलफल गर्नुपर्ने बताएका छन्।

गृहमन्त्री रमेश लेखकको उपस्थितिमा भएको बैठकमा उनले पूर्वराजा शाहलाई समितिमा बोलाएर उक्त घटना उनले घटाएको हो कि होइन सोध्नुपर्ने बताए।

‘१५ गतेको घटना उहाँसँग सम्बन्धित छ कि छैन? यो समितिमा बोलाऊँ पूर्वराजा ज्ञानेन्द्रलाई यो मानवअधिकार उल्लङ्घनको घटना हो कि होइन? एउटा नागरिकको हिसाबले तपाईँ यो घटना गर्न पाउनुहुन्छ? के हो यो कुरा? यसका विषयमा पनि छलफल गर्न आवश्यक छ,’ उनले भने।

कुनै पनि व्यक्तिलाई अराजकता र अमानवीय व्यवहार गर्ने छुट नभएको र पूर्वराजा ज्ञानेन्द्र यतिबेला सामान्य नागरिक मात्रै भएको उनको भनाइ थियो।