संसद्मा सुहाङले सोधे, `इम्बोस्ड नम्बरको औचित्य के हो?´

संसद्को बुधबारको बैठकमा शून्य समयमा बोलेका नेम्वाङले सवारी प्रयोगकर्ता नागरिकलाई सरकारले सास्ती दिइरहेको आरोप लगाए ।

नेम्वाङले पर्याप्त तयारीबिना निर्णय गरेर लागु गर्न खोज्ने सरकारको हठी शैलीमा समेत प्रश्न उठाए ।

“सरकारले इम्बोस्ड नम्बरप्लेट अनिवार्य गर्ने निर्णय गरेको छ । तर, वर्तमान परिस्थितिमा यसले जनतालाई थप शास्ति मात्र बढाउनेछ,” नेम्वाङले भने, “सवारी प्रयोग गर्ने आम जनतामाथि पहिले नै धेरै भार छ । गाडी किन्नसाथ उच्च कर, हरेक वर्ष बिमा, सडक कर तिर्न लामो लाइन र लाइसेन्स बनाउन फारम, परीक्षा र लामो लाइन ।”

उनले यही कारण जनताबाट सरकारप्रति प्रश्न उठिरहेको बताए । “यहाँ जनताको तहबाट प्रश्न उठेको छ, इम्बोस्ड नम्बर प्लेटको औचित्य के हो ? के हामीसँग पर्याप्त प्रविधि, सेवाकेन्द्र र जनशक्ति छ ?,” उनको प्रश्न छ, “जब हजारौँ नागरिकले वर्षौं कुर्दा पनि लाइसेन्स पाएका छैनन् । कर तिर्न दिनभर लाइन बस्नुपरेको छ । यस्तो अवस्थामा इम्बोस्ड नम्बरप्लेट किन अनिवार्य गरिँदैछ, त्यो पनि नम्बर अंग्रेजीमै ?”

उनले यसबाहेक इम्बोस्ड नम्बरमा नागरिकले भाषा र भावनाको पनि प्रश्न उठाइरहेको बताए । “आम जनताले हाम्रो भाषा र भावनासँग जोडेर पनि प्रश्न उठाएका छन्,” नेम्वाङले भने, “त्यसैले मेरो विनम्र आग्रह छ, सरकारले तत्काल इम्बोस्ड नम्बर प्लेट कार्यान्वयन स्थगित गरी आवश्यक पूर्वाधार, प्रविधि र जनशक्ति सुनिश्चित गरेपछि मात्र लागु गरियोस् ।”