रूपन्देही ३ मा हुने उपनिर्वाचन : असोज २१ मा उम्मेदवारी दर्ता, असोज २२ मा उजुरी

काठमाडौं। निर्वाचन आयोगले रूपन्देही ३ मा हुने उपनिर्वाचनका लागि कार्यतालिका सार्वजनिक गरेको छ। आगामी कात्तिक १७ गतेका लागि तय भएको उपनिर्वाचनका लागि आयोगले आइतबार कार्यतालिका सार्वजनिक गरेको हो।

जसअनुसार असोज २१ गते बिहान १० बजेदेखि बेलुका ५ बजेसम्म उम्मेदवारी दर्ताको समय तोकिएको छ। उम्मेदवारको प्रारम्भिक सूचि सोही दिन साँझ ५ देखि ७ बजेभित्र प्रकाशन गर्ने कार्यतालिका रहेको आयोगले जनाएको छ।

उम्मेदवारको सूचीमा उजुरी दिन असोज २२ बिहान १० देखि ३ बजेसम्मको समय निर्धारण गरिएको छ। सोही दिनको दिउँसो १५ बजेदेखि असोज २३ गते बेलुका ५ बजेसम्ममा मनोनयन पत्र र उजुरी उपर जाँचबुझ एवम् निर्णय गरी असोज २३ गते बेलुका ५ बजेदेखि ११ बजेसम्म उम्मेदवारको नामावली प्रकाशन गरिने कार्यतालिका छ।

उम्मेदवारी फिर्ताका लागि असोज २४ गते बिहान १० देखि १२ बजेको समय तोकिएको छ। आयोगले सोही दिन दिउँसो १ देखि ३ बजेभित्र उम्मेदवारको अन्तिम नामावली प्रकाशन गर्नेछ। सोही दिन साँझ ६ बजेसम्म उम्मेदवारलाई चुनाव चिह्न प्रदान गर्ने कार्यतालिका छ। मतदान कात्तिक १७ गते बिहान ७ बजेदेखि बेलुका ५ बजेसम्म हुनेछ।

२०७९ को आम निर्वाचनमा रूपन्देही ३ बाट राप्रपाका दीपक बोहरा निर्वाचित भएका थिए। उनको निधन भएपछि त्यहाँ उपनिर्वाचन हुन लागेको हो।