नाउपाको बैठक बोलाउन रञ्जितामाथि दबाब

काठमाडौँ । नागरिक उन्मुक्ति पार्टी (नाउपा)को केन्द्रीय समिति बैठक बोलाउन २० नेताले अध्यक्ष रञ्जिता श्रेष्ठलाई २४ घण्टे अल्टिमेटम दिएका छन् ।

शुक्रबार नाउपाका पदाधिकारी तथा केन्द्रीय कमिटीका २० सदस्यको उपस्थितमा बसेको बैठकले पार्टी विधानको दफा ४१ को उपदफा ६ अनुसार बैठक बोलाउन अल्टिमेटम दिएको हो ।

यसरी अल्टिमेटम दिने नेताहरूमा पुन्न बहादुर बुढा, विपद राम डगौरा, आलोक चौधरी, गंगाराम चौधरीलगायत छन् । पार्टीलाई गतिशील बनाउनका लागि केन्द्रीय समिति बैठक आवश्यक भएपनि रञ्जिताले बोलाउन आनाकानी गरेको उनीहरूको भनाइ छ ।

आजको मितिले २४ घण्टाभित्र उनले बैठक नबोलाए ११ गतेका लागि काठमाडौँमा बैठक बस्ने समेत रञ्जितालाई जानकारी गराइएको पत्रमा उल्लेख छ । रञ्जितामाथि भ्रष्टाचार मुद्दाको अभियोग लागेको छ। उनीमाथि भूमि मन्त्री भएको रकम लिएको आरोप लागेको छ। कास्कीको भूमि आयोग अध्यक्ष र मालपोत प्रमुख सरुवामा ७८ लाख ‘घुसडिल’ प्रकरणमा पूर्वभूमि व्यवस्थामन्त्रीसमेत रहेकी रञ्जिता मुछिएकी छन्। यसबारे खुलस्त गर्न पनि बैठक बोलाउन दबाब दिइएको हो।