‘कमेडी दरबार’ टिमले फिल्म बनाउने, नाम ‘क का कि की’

काठमाडौँ। चर्चित रियालिटी शो ‘कमेडी दरबार’ टिमले फिल्म बनाउने भएको छ। सोमबार थिम पोस्टर सार्वजनिक गर्दै फिल्म निर्माणको घोषणा गरिएको हो। ‘क का कि की’ नामको फिल्ममा मुख्य कलाकारमा गौरी मल्ल, तृप्ति नाड्कर, रेखा थापा र महेश त्रिपाठी रहनेछन्।

त्यस्तै टिकटकर मिस पबी, पवन खतिवडा, हिमेश पन्त, सुजता श्रेष्ठ, विश्वास तिम्सिना, सीडी विजय अधिकारीलगायत कलाकारको पनि विशेष भूमिका रहने बताइएको छ। फिल्मको निर्देशन विक्की अग्रवाल र श्रद्धा प्रसाईँले संयुक्त रूपमा गर्नेछन्। फिल्म विक्कीसहित विकास अर्याल र सरोज भण्डारीले लेख्नेछन्।

निर्माता श्रद्धा प्रसाईं र सुमित्रा थापाको प्रस्तुतिमा तयार हुन लागेको यस फिल्मको पटकथा विक्की अग्रवालले लेखेका हुन्। छायांकन फिल्मको वितरण श्री वेंकेटेसले, अन्तर्राष्ट्रिय वितरण सेवन सिजले र डिजिटल अधिकार ओएसआर डिजिटलले लिने भएका छन्।

हाल टेलिभिजनमा निकै लोकप्रिय ‘कमेडी दरबार’ सञ्चालन गरिरहेको निर्देशक अग्रवालको टिमको यो पहिलो फिल्मी प्रोजेक्ट हो। निर्देशक अग्रवालका अनुसार चलचित्रको छायांकन आगामी दसैँको टीकाको भोलिपल्ट सुरु हुनेछ। फिल्मको बजेट र प्रदर्शन मिति भने हाल खुलाइएको छैन।

‘आफ्नो फिल्मी करिअरको सुरुआत नै अग्रजहरूसँग सहकार्य गर्ने उत्कृष्ट अवसर पाएको छु। ‘ककाकिकी’को यस यात्रामा हामीलाई विश्वास छ कि सम्पूर्ण दर्शकहरूको साथ फेरि पनि प्राप्त हुनेछ। हाम्रो टिम ‘कमेडी दरबार’को एउटै उद्देश्य अब टेलिभिजनसँगै हलहरूमा पनि तपाईंहरूको हाँसो ल्याउनु हो’, निर्देशक अग्रवालले भने।