कमेडी च्याम्पियन ३ मा विजेता सुनील खड्काले पाए कार

काठमाडौं । कमेडी च्याम्पियन ३ मा विजेता बनेका कमेडियन सुनील खड्काले कार पुरस्कार आज प्राप्त गरेका छन् । अघिल्लो वर्ष असारमा उनले कमेडी च्याम्पियनको उपाधि जितेका थिए ।

सुनीललाई कमेडी च्याम्पियनका सञ्चालक विशाल भन्डारीले आज एक कार्यक्रमबीच कार हस्तान्तरण गरे । करिब ४० लाख रुपैयाँ मूल्यको नेटा कार खड्काले प्राप्त गरेका छन् । उनले विषय परिस्थितिमा पनि आफूलाई कार दिएकोमा भण्डारीप्रति आभार प्रकट गरे ।

भण्डारीले आफू जतिसुकै अप्ठेरो परे पनि साथी, सहकर्मी र विजेतालाई अप्ठेरोमा पार्न नचाहेको बताए ।

कमेडी च्याम्पियनका सञ्चालक भण्डारी अहिले आर्थिक झमेलामा छन् । आफूलाई पार्टनरले धोका दिएको र मुद्दामामलामा अल्झाएको उनको गुनासो छ ।