संविधानसम्मत निकास खोजिनुपर्छ: एमाले

काठमाडौं । मुलुकमा पछिल्ला दिनमा देखिएको असामान्य राजनीतिक परिस्थितिप्रति नेकपा (एमाले) गम्भीर र संवेदनशील बनेको जनाएको छ । पार्टी केन्द्रीय सचिवालयका तर्फबाट महासचिव शंकर पोखरेलबाट आज जारी वक्तव्यमा हालको घटनाक्रमलाई ‘राष्ट्रलाई दशकौँ पछाडि धकेल्ने विनाशकारी स्थिति’ को रूपमा चित्रण गर्दै संविधानसम्मत र लोकतान्त्रिक निकास खोजिनुपर्नेमा जोड दिइएको छ ।

भदौ २३ गते जेन्जी युवाहरुले सामाजिक सञ्जालको स्वतन्त्रता, सुशासन, भ्रष्टाचार र नातावादविरुद्ध प्रदर्शन गर्दा भएको जनधनको क्षतिप्रति एमाले स्तब्ध भएको जनाएको छ । सो घटनामा ज्यान गुमाउनेप्रति श्रद्धाञ्जली र घाइतेप्रति शीघ्र स्वास्थ्यलाभको कामना गर्दै वक्तव्यमा निष्पक्ष छानबिन र दोषीमाथि कानुनी कारबाहीको माग गरिएको छ ।

त्यसको भोलिपल्ट भदौ २४ गते देशव्यापी रूपमा भएको आगजनी, तोडफोड, लुटपाट र हिंसात्मक घटनाले मुलुक स्तब्ध बनेको एमालेको दाबी छ । संसद, राष्ट्रपति भवन, सिंहदरबार, सर्वोच्च अदालत, विमानस्थल, प्रहरी कार्यालयलगायत संवैधानिक निकायमा गरिएको तोडफोड तथा अभिलेख नष्ट हुनु राष्ट्रका लागि ठूलो क्षति भएको एमालेले जनाएको छ । त्यस्तै, १३ हजारभन्दा बढी कैदीबन्दी जेल तोडेर भाग्नु शान्ति–सुरक्षामा गम्भीर चुनौती बनेको एमालेको भनाइ छ ।

आयोजकहरुले आफ्नो प्रदर्शन शान्तिपूर्ण रहेको र तोडफोडमा संलग्न नभएको प्रष्ट्याएको प्रसंग उल्लेख गर्दै वक्तव्यमा योजनाबद्ध रूपमा भएको विनाशकारी घटनाको सत्यतथ्य छानबिन गर्नुपर्ने माग गरिएको छ । साथै यति ठूलो विनाश रोक्न सुरक्षानिकाय प्रभावकारी हुन नसकेको विषयमा पनि समीक्षा हुनुपर्ने एमालेको भनाइ छ ।

प्रधानमन्त्रीको राजीनामापछि अबको राजनीतिक निकास संविधान र लोकतान्त्रिक विधिबाट खोजिनुपर्नेमा एमाले स्पष्ट रहेको बताएको छ । युवा पुस्ताका माग सम्बोधन गर्न सार्थक संवाद सुरु गर्न राष्ट्रपतिलाई ध्यानाकर्षण गराइएको छ । साथै संसद, न्यायपालिका, प्रदेश र स्थानीय तहले लोकतन्त्रको रक्षा र सेवाप्रवाहमा सक्रिय भूमिका खेल्नुपर्ने आग्रह गरिएको छ ।

एमालेले असामान्य स्थितिको लाभ उठाउँदै देशभर अझै पनि भइरहेको आगजनी र लुटपाट नियन्त्रणका लागि सेना सहित सबै सुरक्षा निकायलाई ध्यानाकर्षण गराएको छ । पार्टीले आफ्नो पङ्क्तिलाई सार्वजनिक कार्यालय सरसफाइ, सामाजिक सद्भाव कायम गर्न र पीडितलाई सहयोग पुर्‍याउन आह्वान गरेको छ ।

वक्तव्यमा भनिएको छ, “असामान्य चुनौतीबीच पनि एमाले दृढ विश्वासका साथ अगाडि बढ्नेछ । उच्च मनोबल कायम गरी प्रतिकूलतालाई चिर्नु आवश्यक छ ।