आफ्नो घरलाई संग्रहालय बनाउने सोचमा हुनुुहुन्थ्यो ओली पत्नी राधिका, जलेर खरानी भयो

काठमाडौं। नेकपा एमालेका अध्यक्ष केपी शर्मा ओलीकी पत्नी राधिका शाक्यले जेनजी आन्दोलनका क्रममा आगजनी गरिएको घरको अवलोकन गर्नु गर्नुभएको छ ।

शाक्यले नयाँ पुस्तालाई यो घर संग्राहलयको रुपमा छोडेर जाने बिचार भए पनि अब खरानी छोडेर जानु परेको बताउनुभयो ।

उहाँले जलेका पुस्तकका खरानीको टिका लगाउँदै आफूले यहाँ पुस्तकहरु जतन गरेर राख्ने गरेको,अध्यक्ष ओलीलाई देश विदेशबाट दिइएका सम्मानपत्र तथा बहुमल्य वश्तुहरु समेत संग्राहलयको रुपमा सजाएर राखिएको उहाँले बताउनुभयो।

‘मलाई यो घर ब्यवस्थापन मलाई छ महिना लाग्यो ’ उहाँले भन्नुभयो ‘एउटा कोठामा स्वदेशबाट प्राप्त सम्मान पत्र तथा मायाको चिनो र अर्काे कोठामा चाइना,कम्बोडिया,भारत,भियतनाम,जापान लगायतका देशका प्रधानमन्त्रीहरुले दिएका अमूल्य सामानहरु दराजहरुमा थिए ।’
शाक्यले आगलागी भएको घरका विभिन्न कोठामा के के सामानहरु थिए भनेर सम्झना गर्नुभएको छ ।

‘यति मेरो पसिना र श्रम परेको छ नि’ भावुक हुँदै शाक्यले भन्नुभएको छ ‘बालुवाटार हुँदा पनि म साता दश दिनमा यहाँ आएर सामान मिलाउने र सफाइ गर्ने काम गर्थें ।’

शाक्यले घर फेरि बनाउन सकिए पनि इतिहास फेरि बनाउन नसकिने बताउनुभएको छ । जेनजी आन्दोलनका अराजक जत्थाले बालकोट स्थित अध्यक्ष केपी शर्मा ओलीका दुवै घर जलाएको थियो ।