बिपी राजमार्ग मर्मत सुरु, ‘ट्र्याक खोलेपछि सवारी सञ्चालन

काभ्रे। गत साताको बाढीले क्षतिग्रस्त बिपी राजमार्गको विभिन्न खण्डमा अस्थायी ‘ट्र्याक खोलिएसँगै मर्मत कार्य सुरु भएको छ। राजमार्ग शनिबार बिहानदेखि औपचारिक रूपमा सवारीसाधनको लागि खुलाइएको थियो।

डिभिजन सडक कार्यालय भक्तपुरका सिनियर इञ्जिनियर सुमन योगेशका अनुसार, हाल तीन वटा मेसिनले मुख्य मर्मत कार्य गरिरहेका छन् भने अन्य ‘स्टेशन’मा मेसिन स्ट्याण्डबाई राखिएको छ। कार्यालयले बिपी राजमार्गको १९ स्थानमा डाइभर्सन बनाएर यातायात सञ्चालन गरिरहेको छ।

राजमार्ग अन्तर्गत चौकीडाँडा, कटुन्जे-घुमाउने, चारसयबेँसी, गिम्दीबेँसी, नार्के, चिउरीबास, बोक्सीकुना, कालढुङ्गा, डालाबेँसी, पिप्ले र माम्तीका स्थानमा डाइभर्सन निर्माण गरी पूर्ण सवारी सञ्चालन सम्भव भएको कार्यालयले जनाएको छ।

रोशी खोलाको बाढीले करिब चार किलोमिटर सडक कटान गरेको र काभ्रेपलाञ्चोक तथा सिन्धुली खण्डमा डाइभर्सन निर्माण गरिएको छ। कार्यालयले चालक र यात्रुलाई विशेष सावधानी अपनाउन अपिल गरेको छ।

पूर्वी नेपाल जोड्ने छोटो दूरीको यो राजमार्गबाट दैनिक हजारौँ सवारीसाधन आवतजावत गर्दै आएको छ। कार्यालयले स्थायी मर्मतको लागि चार खण्डमा ठेक्काको प्रक्रिया अगाडि बढाएको छ।