गैरसरकारी संस्था, संघ, मठ, मन्दिर र ट्रष्टको नाममा रहेको जग्गा बिक्री नगर्न काठमाडौं प्रशासनको अनुरोध

काठमाडौं। जिल्ला प्रशासन कार्यालय काठमाडौंले गैरसरकारी संस्था, संघ, मठ, मन्दिर र ट्रष्टको नाममा रहेको जग्गा बिक्री नगर्न/नगराउन अनुरोध गरेको छ ।

गृह मन्त्रालयको पत्रानुसार नेपालभर रहेका संघ, संस्था, मठ, मन्दिर लगायतका नाममा रहेको जग्गा तथा अचल सम्पतिको बिक्री वितरण गर्न नपाइने जिल्ला प्रशासनको सूचनामा उल्लेख छ ।

तर, यसरी बिक्री वितरण गर्न रोकिएको अवस्थामा पनि केही संस्थाहरूले जग्गा बिक्री गरेको भन्ने सूचना प्राप्त हुन आएको भन्दै प्रशासनले गम्भीर ध्यानाकर्षण भएको जनाएको छ ।

‘काठमाडौं जिल्लाभित्रका मालपोत कार्यालयले समेत यसै सूचनालाई आधार लिई त्यस प्रकारको जग्गा बिक्री वितरण, हक हस्तान्तरण, लिखत पारितका कार्य नगर्न/नगराउनहुन जानकारी गराइनुका साथै निर्णय विपरीत जग्गा बिक्री वितरण गरेको पाइएमा प्रचलित कानून बमोजिम कारबाही गरिने व्यहोरा समेत यसै सूचनाद्वारा जानकारी गराइएको छ’, प्रशासनले भनेको छ।