बाढीले झापामा पाँच करोडभन्दा बढीको धान नष्ट

झापा। असोज १८ देखि २० गतेसम्म परेको अविरल वर्षापछि आएको बाढीले झापामा करिब पाँच करोड रुपैयाँ बराबरको धानबाली नष्ट गरेको छ।

कृषि ज्ञान केन्द्र झापाका प्रमुख सागर विष्टका अनुसार बाढीले ४६३ दशमलव ४२ हेक्टर क्षेत्रफलमा लगाइएको धानबाली पूर्णरूपमा नष्ट गरेको हो। यसबाट ७०३ कृषकको करिब रु ५ करोड ७५ लाख २३ हजार बराबरको १ हजार ६४४ दशमलव ३३ मेट्रिक टन धान क्षति पुगेको छ।

“बाढीले अन्य कृषिबालीमा पनि असर गरेको छ, तर सबैभन्दा ठूलो क्षति धानमा पुगेको छ,” प्रमुख विष्टले भन्नुभयो, “पाक्न लागेको धान बगाउँदा किसानको बिचल्ली भएको छ।”

वर्षाका कारण कनकाई र विरिङ नदीमा आएको बाढीले धेरै खेत बगाएको र गौरीगञ्ज, झापा गाउँपालिका, भद्रपुर, कनकाई, शिवसताक्षी र गौरादह नगरपालिकामा व्यापक क्षति पुगेको जनाइएको छ।

विशेषगरी झापा गाउँपालिकामा बढी क्षति भएको कार्यालयले जनाएको छ। सो पालिकाको वडा नं १, २ र ३ का ४३१ किसानको करिब रु ५ करोड १४ लाख ४७ हजार बराबरको धान, आलु र केरा नष्ट भएको कृषि ज्ञान केन्द्रले जानकारी दिएको छ।