फूलखेतीबाट एक याममा पाँच लाख बढी आम्दानी

वालिङ (स्याङ्जा)। स्याङ्जा, चापाकोट नगरपालिका–१ चौघेराका तुल्सीराम भण्डारीले व्यावसायिक फूलखेतीबाट एक याममा पाँच लाखभन्दा बढी आम्दानी गर्दै आएका छन्। पूर्व शिक्षक भण्डारी दसैँ, तिहारलगायत चाडपर्व लक्षित गरी दुई चरणमा फूलखेती गर्दै आएका छन्।
गत असारमा शिक्षण पेसाबाट अवकाश लिनुभएका भण्डारीले फुर्सदको समयलाई सदुपयोग गर्दै तीन रोपनीमा दसैँ–तिहारका लागि र दुई रोपनीमा मङ्सिरपछि उत्पादनका लागि फूलखेती गर्दै आएका छन्।
भण्डारीले बाँदरले अन्नबाली नष्ट गरिदिएपछि विकल्पका रूपमा फूलखेती सुरु गरेको जानकारी दिए। यहाँ उत्पादन भएको फूल बुटवल, नारायगढ, बर्दघाट, पोखरा लगायतका बजारमा सजिलै बिक्री हुने गरेको छ।

‘कर्मा ५५५ मेरीगोल्ड’ जातको फूल लगाउने भण्डारीलाई श्रीमती र छोराद्वयले सहयोग गरिरहेका छन्। फूलका थुङ्गा थोकमा प्रतिकिलो रु ३००, फुटकरमा रु ४००–४५०, र माला प्रतिगोटा रु ९० मा बिक्री हुँदै आएको छ। यस वर्ष हालसम्म करिब रु छ लाखको फूल तथा माला बिक्री भइसकेको छ भने तिहारपछि पनि बुटवल तथा स्थानीय बजारबाट माग बढेको छ।
गतवर्ष एक याममा पाँच लाखभन्दा बढी आम्दानी गरेको भण्डारीले यस वर्ष रु १० लाखभन्दा बढी आम्दानी गर्ने लक्ष्य रहेको जानकारी दिनुभयो।