यी हुन् सन् २०२६ मा विश्वकप खेल्ने २० टोली

काठमाडौं । सन् २०२६ मा भारत र श्रीलंकामा आयोजना हुने आईसीसी टी-२० विश्वकप क्रिकेट खेल्ने सबै २० टिको टुङ्गो लागेको छ ।

ओमानमा भइरहेको आईसीसी टी२० विश्वकप एसिया-इएपी छनोटबाट नेपाल, ओमान र युएईले विश्वकपमा स्थान बनाएपछि सबै २० टोलीको निर्णय भएको हो ।

बिहीबार भएको सुपर सिक्सको खेलम युएईले जापानलाई पराजित गरेपछि विश्वकपमा छनोट अने अन्तिम (२०औं) टोली बनेको हो । एसिया-इएपी छनोटमा ९ टिमले प्रतिस्पर्धा गरेकोमा शीर्ष तीन टोली विश्वकपमा पुग्ने प्रावधान थियो ।

पुरुष टी२० विश्वकपको १०औं संस्करण २०२६ फेब्रुअरी ७ देखि मार्च ८ सम्म (माघ २७ देखि फागुन २४ गते) भारत र श्रीलंकाको विभिन्न मैदानमा हुनेछन्।

२० टिमकै टुङ्गो लागेपछि अब विश्वकपका लागि समूह विभाजन हुनेछ भने खेल स्थलहरू पनि तय गरिनेछ ।

२०२६ को विश्वकपका लागि एसियाबाट सर्वाधिक ८ टोली (भारत, श्रीलंका, अफगानिस्तान, बंगलादेश, पाकिस्तान, नेपाल, ओमान, युएई) छनोट भएका छन् ।

यस्तै युरोपबाट ४ (इंग्ल्याण्ड, आयरल्याण्ड, नेदरल्याण्ड्स, इटली), अफ्रिकाबाट ३ (दक्षिण अफ्रिका, जिम्बाबे, नामिबिया), अमेरिकाजबाट २ (अमेरिका, क्यानडा), क्यारेबियनबाट १ (वेष्ट इन्डिज) तथा ओसियाना क्षेत्रबाट २ (अष्ट्रेलिया, न्युजिल्याण्ड) टिमले विश्वकप खेल्नेछन् ।