अन्नपूर्ण आधार शिविर क्षेत्रमा सुरक्षाकर्मी परिचालन

म्याग्दी। मौसममा आएको खराबी र हिमपातका कारण अन्नपूर्ण आधार शिविर क्षेत्रमा भ्रमणमा गएका पर्यटकको सहजीकरणका लागि सुरक्षाकर्मीको टोली परिचालन गरिएको छ।

अन्नपूर्ण गाउँपालिका–४ नारच्याङस्थित आधार शिविर क्षेत्रमा गएरातिदेखि भारी हिमपात भइरहेको छ। अत्यधिक पर्यटक आगमन र सञ्चारको पहुँच नहुँदा बिरामी वा अलपत्र पर्ने जोखिम बढेकोले नेपाल प्रहरी र सशस्त्र प्रहरीको टोली ‘मौरिस हर्जोग’ पदमार्ग हुँदै आधार शिविरमा पठाइएको प्रमुख जिल्ला अधिकारी बद्रीप्रसाद तिवारीले जानकारी दिनुभयो। टोलीमा हिमाली उद्धारकर्मी इन्द्रसिंह शेरचन समेत सहभागी हुनुहुन्छ।

जल तथा मौसम विज्ञान विभागको बुलेटिनअनुसार आगामी शुक्रबारसम्म हिमाली क्षेत्रमा हिमपात र वर्षाको सम्भावना रहेकाले आधार शिविरमा जान पूर्ण रोक लगाइएको छ। गाउँपालिकाले पनि पर्यटकलाई सुरक्षित रहन र सतर्क रहन आग्रह गरेको छ।