मुस्ताङ र मनाङमा भारी वर्षा

काठमाडौँ।  पश्चिमी वायु र अरब सागरबाट उत्पन्न न्यून चापीय प्रणालीको प्रभावका कारण देशभर मौसम बदली हुँदा मुस्ताङ र मनाङमा आज भारी वर्षा भएको छ।

जल तथा मौसम विज्ञान विभागका सूचना अधिकारी दिनकर कायस्थका अनुसार, पछिल्लो २४ घण्टामा मनाङको चामेमा ६४.४ मिलिमिटर र मुस्ताङको जोमसोममा ५१.२ मिलिमिटर वर्षा अभिलेख भएको छ। विभागका मापदण्डअनुसार ५० देखि १०० मिलिमिटर वर्षालाई भारी वर्षा मानिन्छ।

अन्य धेरै जिल्लामा पनि मध्यम वर्षा भएको विभागले जनाएको छ। दिउँसो ३ः४० बजेसम्मको अभिलेखअनुसार डोल्पाको दुनैमा ३६ मिलिमिटर, जुम्लामा १३ मिलिमिटर, बागलुङ र पर्वतमा २४ मिलिमिटर, प्यूठानमा २१.८ मिलिमिटर, सिन्धुपाल्चोकमा २९.६ मिलिमिटर, चितवनमा २३ मिलिमिटर, र लमजुङमा २७ मिलिमिटर वर्षा मापन गरिएको छ। विभागका अनुसार हिमाली क्षेत्रमा बाक्लो हिमपात भइरहेको छ भने तल्लो भेगमा वर्षा जारी छ। काठमाडौँ उपत्यकामा भने हल्का वर्षासँगै चिसो बढेको छ।

यसैबीच, आज राति बागमती, गण्डकी र कर्णाली प्रदेशका उच्च पहाडी तथा हिमाली भू–भागमा भारी हिमपात र वर्षा हुने सम्भावना रहेको जल तथा मौसम विज्ञान विभागले जनाएको छ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणकी प्रवक्ता शान्ति महतले निरन्तर वर्षा र हिमपातका कारण आवश्यक सावधानी अपनाउन सबैलाई आग्रह गर्नुभएको छ।