डुम्रे–बेसीशहर–चामे सडक बन्द

तनहुँ। डुम्रे–बेसीशहर–चामे सडक योजनाअन्तर्गत पर्ने भानु नगरपालिकाको चाम्बासदेखि तुरतुरेसम्मको सडकखण्ड अस्थायी रूपमा बन्द हुने भएको छ ।

सो सडक क्षेत्रमा रोडवे एक्स्काभेसन कार्य भइरहेको र सो क्रममा सवारी आवागमनका क्रममा दुर्घटना हुने जोखिम देखिएकाले जिल्ला प्रशासन कार्यालय तनहुँले अस्थायी रूपमा सडक बन्द गर्ने निर्णय गरेको हो ।

जिल्ला प्रशासन कार्यालयले आइतबार सार्वजनिक गरेको सूचनामा निर्माण कार्य सहज र सुरक्षित ढङ्गले सम्पन्न गर्न कात्तिक २४ गतेदेखि मङ्सिर ५ गतेसम्म सडक अवरुद्ध गरिने उल्लेख गरिएको छ । जिल्ला प्रशासन कार्यालयका प्रशासकीय अधिकृत विकास श्रेष्ठद्वारा हस्ताक्षरित सूचनामा सडक अवरुद्ध रहने अवधिमा बिहान र दिउँसो गरी तोकिएको समयमा मात्र सवारी सञ्चालनमा रोक लगाइने निर्णय भएको छ ।

बिहान ६ बजे देखि ९ बजेसम्म, बिहान ११ बजेदेखि दिउँसो १ बजेसम्म दिउँसो २ बजेदेखि ४ बजेसम्म बन्द हुने सूचनामा उल्लेख छ । सडक बन्द रहने अवधिमा यात्रु तथा सवारी साधनहरूका लागि तुरतुरे पालुङटार–खत्रीटार हुँदै बिमलनगरको मार्ग वैकल्पिक बाटोका रूपमा प्रयोग गर्न सकिने जनाइएको छ ।

निर्माण कार्यका क्रममा हुन सक्ने असुविधा र दुर्घटना जोखिम न्यूनीकरणका लागि सबैको सहयोग आवश्यक रहेको सूचनामा उल्लेख छ । सडक निर्माण कार्यलाई सहज बनाउन सर्वसाधारण, स्थानीय निकाय र सरोकारवाला निकायहरूप्रति सहकार्यको अपेक्षा गरिएको सूचनामा जनाइएको छ ।