कम्युनिस्ट राजनीतिकाे सिंह एमाले हो : महेश बस्नेत

दाङ । नेकपा (एमाले) का पाेलिटब्यूराे सदस्य महेश बस्नेतले नेपाली कम्युनिस्ट राजनीतिमा एमाले पार्टी नै सिंहकाे रूपमा स्थापित भएको बताएका छन । उनले एमालेको इतिहास, संगठन र जनसमर्थनका आधारमा अन्य कुनै दलले एमालेसंग प्रतिस्पर्धा गर्न नसक्ने ठोकुवा गरेका हुन ।

राष्ट्रिय युवा संघ नेपाल लुम्बिनी प्रदेशले बिहीबार तुलसीपुरमा आयोजना गरेको प्रदेशस्तरीय जागरण सभालाई सम्बोधन गर्दै बस्नेतले भने,` एउटै घाटमा स्याल, कुकुर, बिरालाे सबै पानी खान आइरहेका छन भने के बुझ्नुपर्छ भने माथिल्लो घाटमा सिंह एक्लै पानी खाइरहेकाे छ र त्यहाँ कसैले पानी खान हिम्मत गरिरहेकाे छैन । त्यसैले नेपाली कम्युनिस्ट आन्दोलनकाे सिंह नेकपा एमाले हाे ।´

उनले एमाले अध्यक्ष केपी शर्मा ओलीप्रति राज्य संयन्त्र प्रयोग गरी गरिएको व्यवहारप्रति असन्तोष व्यक्त गरे । उनले भने`यदि एमालेका कुनै नेतामाथि बयानका नाममा दुःख दिने काम भयो भने पाँच हजार, दश हजार होइन, एक लाख युवाले सिंहदरबार घेराउ गर्ने छन् ।´

बस्नेतले एमालेविरुद्ध चलाइएका षड्यन्त्रहरू विफल हुने दाबी गर्दै पार्टी संगठन झनै बलियो बन्दै गएको बताए ।