एनपीएलमा विराटनगरको सानदार सुरुवात, स्तब्ध पोखरा

काठमाडौं। विराटनगर किंग्सले नेपाल प्रिमियर लिग (एनपीएल) दोस्रो संस्करणमा सानदार सुरुवात गरेको छ ।

विराटनगरले मंगलबार कीर्तिपुरस्थित त्रिवि क्रिकेट मैदानमा पोखरा एभेन्जर्सविरुद्ध ५३ रनको सहज जित निकाल्यो ।

विराटनगरले प्रस्तुत गरेको २ सय २१ रनको कीर्तिमानी लक्ष्य पछ्याएको पोखरा १८.५ ओभरमा १ सय ६७ रनमा समेटियो ।

पोखराका लागि कप्तान कुशल भुर्लेलले ३१ बलमा पाँच चौका र चार छक्काको मद्दतले सर्वाधिक ५९ रनको योगादान गरे । यसैगरी एडम रोसिङटन ३९, ड्यानियल डायथवेटले २९ र अभिषेक तिवारीले ११ रन बनाए ।

दोस्रो विकेटका लागि कुशल र रोसिङटनबीच ७६ रनको साझेदारी भएको थियो । यो साझेदारी शुभम रन्जानेले तोडेका थिए । विराटनगरका लागि कप्तान सन्दीप लामिछाने, शुभम रन्जाने, प्रतिश जिसी र मर्चेन्ट डी लाङ्गले समान दुई तथा बसिर अहमद र सूर्य तामाङले समान एक विकेट लिए ।

त्यसअघि टस हारेर ब्याटिङको निम्तो पाएको विराटनगरले निर्धारित २० ओभरमा ६ विकेट गुमाउँदै २ सय २० रनको योगफल तयार पारेको थियो । यो एनपीएलकै सार्वाधिक योगफल हो । पहिलो संस्करणमा विराटनगरले नै लुम्बिनी लायन्सविरुद्ध १ सय ९३ रन बनाएको थियो ।

विराटनगरका लागि लोकेश बमले ४८ बलमा ७ छक्का र १ चौकासहित सर्वाधिक ७२ रनको योगदान गरे । यसैगरी गप्टिलले ३५ बलमा पाँच छक्का र तीन चौकाको मद्दतले ६१, शुवम रन्जानेले ३८, बसिर अहमदले २३, नरायाण जोशीले अविजित ११ र जर्ज मुन्सेले १० रन बनाए ।

दोस्रो विकेटका लागि लोकेश र गप्टिलबीच १३२ रनको साझेदारी भएको थियो । यो साझेदारीलाई सागर ढकालले तोडेका थिए ।

पोखराका लागि म्याट टेलरले दुई तथा आकश चन्द, सागर ढकाल र कुशल भुर्तेलले समान एक विकेट लिए ।