सिमरा तनावः प्रधानमन्त्री कार्कीद्वारा राष्ट्रिय सुरक्षा परिषद् बैठक आह्वान

काठमाडौं।  नेकपा एमाले महासचिव शंकर पोखरेल र नेता महेश बस्नेतको कार्यक्रममा सहभागी हुन जाने तयारीसँगै बाराको सिमरा क्षेत्रमा बुधबारदेखि सुरु भएको तनाव अझै साम्य भएको छैन। यसैबीच, प्रधानमन्त्री सुशीला कार्कीले राष्ट्रिय सुरक्षा परिषद् बैठक बोलाउनुभएको छ।

प्रधानमन्त्रीको सचिवालयका अनुसार बैठक बिहीबार दिउँसो साढे २ बजे सिंहदरबारस्थित सुरक्षा परिषद्को सचिवालयमा बस्नेछ।
एमालेसँगको विवादका कारण सिमरास्थित विमानस्थलमा बुधबार जेन–जेड युवाहरूले तोडफोड गरेका थिए।

त्यसपछि कर्फ्यु आदेश जारी गरिएको थियो, जुन बिहीबार राति ८ बजेसम्म लम्ब्याइएको छ। बुधवारदेखि सुरु भएको तनाव नरोकिएपछि आज पुनः कर्फ्यु जारी गरिएको हो।

यसअघि गत शुक्रबार बसेको राष्ट्रिय सुरक्षा समिति बैठकले निर्वाचनमा सेना परिचालनका लागि रक्षा मन्त्रालयमा पत्र पठाउने निर्णय गरेको थियो। सुरक्षा परिषद्ले पनि सेना परिचालनबारे निर्णय गर्नुपर्ने भएकाले आजको बैठकमा त्यस विषयमा छलफल हुने स्रोतले जानकारी दिएको छ।