राष्ट्र बैंकद्वारा नयाँ मौद्रिक सर्कुलर जारी, के पर्छ असर?

काठमाडौं। नेपाल राष्ट्र बैंकले चालु आर्थिक वर्षको मौद्रिक नीतिको पहिलो त्रैमासिक समीक्षाको आधारमा बैंक तथा वित्तीय संस्थाका लागि नयाँ व्यवस्थाको सर्कुलर जारी गरेको छ।

सर्कुलरअनुसार, बाढीपीडित जिल्लाका उद्यम–व्यवसाय कर्जालाई ऋणीको अनुरोधमा पुनरसंरचना गर्न सकिने व्यवस्था छ। यसका लागि नगद प्रवाह र आम्दानीको विश्लेषण गरी कम्तीमा १० प्रतिशत ब्याज असुल गरी आगामी चैतभित्र पुनरसंरचना सक्नुपर्नेछ।

अब बैंक तथा वित्तीय संस्थाले प्रयोजन नखुलाई एक करोड रुपैयाँसम्म व्यक्तिगत कर्जा (अधिविकर्षसहित) दिन सक्नेछन्। तोकिएको सीमा नाघेमा अतिरिक्त रकममा १०० प्रतिशत कर्जा नोक्सानी व्यवस्था लागू हुनेछ।

विशेष कार्यक्रमका लागि उपलब्ध कर्जाको ब्याजदर घटाएर ५.७५ प्रतिशत गरिएको छ, जसले कृषि, लघु उद्यम र प्राथमिकता क्षेत्रका कर्जामा राहत ल्याउनेछ।
त्यसैगरी ‘घ’ वर्गका वित्तीय संस्थाले विपन्न तथा न्यूनआय समूहलाई कृषि वा लघु उद्यमका लागि दिने कर्जा सात लाखबाट १५ लाख रुपैयाँ पुर्‍याइएको छ। तर, समूहका सदस्यले एकैपटक कर्जा वा धितो कर्जामध्ये केवल एक विकल्प लिन पाउने व्यवस्था छ।