राप्रपाले मंसिर २३ मा बृहत् आन्दोलन घोषणा गर्ने

काठमाडौं। राष्ट्रिय प्रजातन्त्र पार्टी (राप्रपा)ले जेनजी आन्दोलनपछिको परिवर्तित राजनीतिक परिस्थिति र आगामी राजनीतिक सहमतिको आवश्यकता औंल्याउँदै यही मंसिर २३ गते काठमाडौंको रत्नपार्कमा बृहत् आन्दोलन गर्ने घोषणा गरेको छ ।

आन्दोलनको समग्र तयारी र रणनीति निर्माणका लागि पार्टीले एउटा विशेष आन्दोलन परिचालन समिति गठन गरेको छ । राप्रपाले पार्टीका प्रवक्ता ज्ञानेन्द्र शाहीलाई आन्दोलन परिचालन समितिको संयोजक तोकेको जनाएको छ ।

समितिमा प्रवक्ता गोपाल दाहाल, सह–महामन्त्री रविन्द्र प्रताप शाह र सह–महामन्त्री धनबहादुर बुढा सदस्यका रूपमा चयन हुनुभएको छ।

समितिको पहिलो बैठक बुधबार पार्टी केन्द्रीय कार्यालय धुम्बाराहीमा बसेको छ, जहाँ अध्यक्ष राजेन्द्र लिङ्देन स्वयं उपस्थित रहेर आन्दोलनका एजेन्डा तथा व्यवस्थापनबारे निर्देशन दिनुभएको छ।

बैठकमा २३ गतेको आन्दोलनलाई शान्तिपूर्ण, संगठित र संख्यात्मक रूपमा प्रभावशाली बनाउन आवश्यक तयारीबारे विस्तृत छलफल भएको राप्रपाले जनाएको छ ।