सरकारलाई ज्ञानेन्द्र शाहीको आग्रह- प्रदेश खारेज गर्नुस्

काठमाडौं। राष्ट्रिय प्रजातन्त्र पार्टी (राप्रपा) का प्रवक्ता ज्ञानेन्द्र शाहीले प्रदेश खारेज गर्न सरकारसमक्ष अपिल गर्नुभएको छ।

राप्रपाको काठमाडौंकेन्द्रित प्रदर्शनसभालाई मंगलबार सम्बोधन गर्दै उनले प्रदेश खारेज गर्न माग गर्नुभएको हो।

‘आज १८ खर्बभन्दा बढी रकम प्रदेशका नाममा खर्च भएको छ, त्यसकारण अहिलेको सरकारलाई हामी के भन्छौं भने, प्रदेश खारेज गर्नुस्, जनताबाट प्रत्यक्ष निर्वाचित कार्यकारी ल्याउनुस्’, शाहीले भन्नुुभयो।

१ अर्बको मात्र एउटा अस्पताल बनाएको भए १८ सय अस्पताल बन्ने पनि उहाँको भनाइ छ । ‘संविधान संशोधन गर्नुस्, आज अख्तियारलगायतका ठाउँमा राजनीतिक दलहरूलाई नियुक्ति गर्न बन्द गर्नुस्, अनि चुनावमा जाऔं । नयाँ जनादेशका साथ आऔं’, उहाँले भन्नुभयो।

उहाँले विघटित प्रतिनिधिसभाका सभामुख तत्कालीन प्रधानमन्त्रीको ‘गोटी’ बनेको आरोप समेत लगाउनुभयो।