सुदूरपश्चिम जस्तो टोलीलाई त्यति रनमा रोकिन्छ भन्ने लागेको थिएन ; रोहित पौडेल

काठमाडौं। लुम्बिनी लायन्सका कप्तान रोहितकुमार पौडेलले नेपाल प्रिमियर लिग (एनपीएल)को फाइनलमा सुदूरपश्चिमलाई सहजै हराएर उपाधि जितेकोमा खुसी व्यक्त गर्नुभएको छ।

कीर्तिपुरस्थित त्रिवि अन्तर्राष्ट्रिय क्रिकेट मैदानमा आज साविक उप-विजेता सुदूरपश्चिमलाई हराएर उपाधि जितेपछि सञ्चारकर्मीहरूसँग रोहितले खुसी व्यक्त गर्नुभयो।

उहाँले आजको खेलमा सुदूरपश्चिमलाई ८५ रनमै रोक्न सकिन्छ जस्तो नलागेको बताउनुभयो । ‘सुदूरपश्चिमजस्तो टिमलाई ८५ रनमा रोक्न सकिन्छ भनेर सोचेका थिएनौँ’, उहाँले भन्नुभयो ‘त्यस्तै १४०-५० रनमा रोक्न सकेमा राम्रो हुन्छजस्तो लागेको थियो ।’

उहाँले खेलको पहिलो ओभरमा नै रुविन ट्रम्पलम्यानले विकेट लिएपछि टोलीमा आशा बढेको र आफूले ह्याट्रिक गरेपछि सुदूरपश्चिम पूरै दबाबमा परेको बताउनुभयो। उहाँले आजको खेलमा रुविनसँगै शेर मल्ल, तिलक भण्डारी र दिनेश अधिकारीले राम्रो प्रदर्शन गरेको बताउनुभयो ।

यद्यपि, रोहितले जारी प्रतियोगितामा आफूले व्यक्तिगत रूपमा सन्तुष्ट हुने गरी खेल्न नसकेको बताउनुभयो।

पौडेलले एनपीएलको यस सिजनमा उत्कृष्ट प्रदर्शन गरेर कार र बाइक जित्नुभयो। उहाँ सबैभन्दा धेरै रन बनाउने नेपाली खेलाडी बन्नुभयो।