प्रतिस्पर्धाबाट कार्यकर्ताको विश्वास जित्न सक्ने व्यक्ति नै नेतृत्वमा पुग्नुपर्छ

नेकपा (एमाले) को ११औँ राष्ट्रिय अधिवेशन तथा बन्द सत्र काठमाडौँको भृकुटीमण्डपमा जारी छ। अधिवेशनमार्फत पार्टीको आगामी नेतृत्व चयन हुँदै गर्दा यसलाई एमालेको संगठनात्मक र वैचारिक दिशाका हिसाबले अत्यन्त महत्वपूर्ण रूपमा हेरिएको छ। यही सन्दर्भमा पार्टी अध्यक्ष केपी शर्मा ओली समूहबाट उपाध्यक्ष पदका उम्मेदवार तथा पूर्व सूचना तथा सञ्चार मन्त्री पृथ्वी सुब्बा गुरुङसँग हामीले कुराकानी गरेका थियौँ।

कुराकानीका क्रममा उहाँले जनताको बहुदलीय जनवाद को मूल मर्म नै प्रतिस्पर्धालाई स्वीकार गर्नु भएको स्पष्ट पार्नुभयो। “जनताको बहुदलीय जनवादको मार्गदर्शनमा चल्ने पार्टीका लागि प्रतिस्पर्धा एकदमै स्वागतयोग्य कुरा हो,” उहाँले भन्नुभयो। उहाँका अनुसार प्रतिस्पर्धाबाट कार्यकर्ताको विश्वास जित्न सक्ने व्यक्ति नै नेतृत्वमा पुग्नुपर्छ भन्ने मान्यतामा एमाले विश्वास गर्छ।