अफगानिस्तानसँग पनि नेपालको हार

काठमाडौं। नेपाली टोली लगातार तीन खेल हार्दै एसियाली क्रिकेट काउन्सिल (एसीसी) पुरुष यू–१९ क्रिकेट प्रतियोगिताको उपाधि होडबाट बाहिरिएको छ ।

नेपाली टोली संयुक्त अरब इमिरेट्स (यूएई) मा जारी यू–१९ एसिया कपको आफ्नो तेस्रो खेलमा बुधबार अफगानिस्तानसँग ६ विकेटले पराजित भयो । यसअघि, नेपाली टोली आफ्नो पहिलो खेलमा श्रीलंकासँग आठ विकेटले र दोस्रो खेलमा बंगलादेशसँग सात विकेटले पराजित भएको थियो ।

नेपाल समूह ‘बी’ तालिकामा सबैभन्दा तल रह्यो । उक्त समूहबाट श्रीलंका र बंगलादेश प्रतियोगिताको सेमिफाइनलमा पुग्न सफल भए । नेपाललाई हराएको अफगानिस्तान पनि उपाधि होडबाट बाहिरियो ।

समूह ‘ए’ बाट भने तीनवटै खेल जित्दै भारत ६ अंकसहित विजेताका रूपमा सेमिफाइनलमा पुग्यो । उक्त समूहबाट पाकिस्तान उप­–विजेता बन्दै सेमिफाइनलमा पुगेको छ । यूएई र मलेसिया भने बाहिरिए ।

दुबईस्थित द सेभेन्स स्टेडियममा खेलिएको आफ्नो अन्तिम खेलमा टस हारी ब्याटिङको निम्तो पाएको नेपालले निर्धारित ५० मध्ये ४६.४ ओभरमै अलआउट हुनुअघि एक सय २४ रनमात्र बनाउन सक्यो ।

नेपालका लागि दिलसाद अलीले सर्वाधिक ३२ रन बनाए । चौथो नम्बरमा क्रिज समाल्न आएका उनले ६८ बलमा चारवटा चौका हिर्काए ।

तल्लोक्रमका ब्याट्सम्यान चन्दन रामले २७ रन बनाए । उनले ४० बलमा दुई छक्का र एक चौका हिर्काए । अभिषेक तिवारीले २० र रोशन विश्वकर्माले १२ रन जोडे ।

नेपाली टोलीका अन्य ब्याट्सम्यानले दोहोरो अंकमा समेत रन बनाउन सकेनन् । ओपनर साहिल पटेल एक र निरज कुमार यादव आठ रनमै पेभेलियन फर्किएका थिए ।

विकेटकिपर ब्याट्सम्यान आशिष लुहार चार, कप्तान अशोक धामी पाँच र युवराज खत्री नौ रनमा आउट भए । नितिस कुमार र विपिन शर्माले खाता खोल्न सकेनन् ।

नेपालले अतिरिक्त रूपमा ६ रन पायो । अफगानिस्तानका बलर जैतुल्लाह शाहिनले तीन विकेट लिए । वाहिदुल्लाह जदरान, नुरिस्तानी ओमरजाई र अब्दुल अजिजले पनि दुई–दुई विकेट हात पारे ।

जवाफी ब्याटिङमा ओर्लिएको अफगानिस्तानले २६.५ ओभरमै केवल चार विकेट गुमाएर विजयी लक्ष्य पूरा गर्‍यो । अफगानिस्तानको जितमा उजाइरुल्लाह निजाईले सर्वाधिक ६१ रनको योगदान गरे ।

चौथो नम्बरमा क्रिज समाल्न आएका उनले ५९ बलको सामना गरी दुई छक्का र सात चौका पनि हिर्काए । ओपनर ओस्मान सदातले पनि ५१ बलमा तीन चौकाको मद्दतले २८ रन बनाए ।

अर्का ओपनर फैसल सिनोजादा १६ बलमा दुई चौकाको मद्दतले १३ रन बनाउँदै पेभेलियन फर्किए । कप्तान महबुब खान ११ र अजिजुल्लाह मिखाइल पनि ११ रनमा अविजित रहे ।

अफगानिस्तानले अतिरिक्त रूपमा केवल एक रन पायो । नेपाली टोलीका बलर अभिषेक तिवारीले दुई विकेट लिए । विपिन शर्मा र चन्दन रामले पनि एक–एक विकेट हात पारे ।