रिहापछि रविको उद्घोष ; अन्यायमा पार्नेसँग लडाइँ बाँकी नै छ

काठमाडौं। स्वतन्त्र पार्टी (रास्वपा)का सभापति रवि लामिछानेले न्यायको लडाइँ बाकी नै रहेको बताउनुभएको छ।

जिल्ला अदालत, रुपेन्देहीमा बैंक जमानत बुझाएर छुटेपछि शुक्रबार साँझ आफ्ना समर्थकलाई सम्बोधन गर्दै लामिछानेले लडाइँ बाँकी नै रहेको बताउनुभएको छ।  ‘न्यायको यो लडाइँ मेरो बाँकी नै छ, लड्नु छ,’ उहाँले भन्नुभयो, ‘मैले लड्नु बाँकी छ, लड्नु छ भनेको मेराका लागि होइन, तपाईंका लागि, यो देशको न्यायका लागि लड्नु छ।’

उहाँले आफूमाथि भएको अन्यायको हिसाब गर्न बाँकी रहेको बताउनुभएको छ। ‘यिनीहरूले देशमाथि गरेको अन्यायका अगाडि ममाथि गरेको अन्याय केही पनि होइन। त्यसको हिसाब गर्नु छ, त्यसको हिसाब गरेपछि अनि लामो बोलौंला,’ समर्थकहरूलाई सम्बोधन गर्दै लामिछानेले भन्नुभयो ‘आज यति मात्रै भन्छु- हिसाब मिलाउन बाँकी नै छ, न्याय पाउन बाँकी नै छ।’

उहाँले धेरै बोल्ने समय आउन बाँकी रहेको जिकिर गर्नुभयो। ‘म आसा गर्छु, यो देशले चाँडै न्याय पाउनेछ। मैले बोल्ने समय आउँदै छ, केही समय धैर्य गर्नुहोला। धेरै कुरा भन्न बाँकी छ।’

लामिछानेले आफूलाई साथ दिन सबैलाई धन्यवाद दिएका छन्। उहाँले भन्नुभयो ‘सबै जनालाई यो माया, यो साथ, यो विश्वास, यो अनवरत सद्भावका लागि धेरै धेरै धन्यवाद दिन्छु।’

उहाँले चाँडै धेरै करा बोल्ने बताउनुभयो। लामिछानले भन्नुभयो, ‘आजलाई यत्ति, धेरै बोल्ने दिन आउँदै छ।’ जिल्ला अदालत, रुपेन्देहीमा बैंक जमानत बुझाएपछि छुटेका उहाँ चितवनतिर लाग्नुभएको हो। शनिबार चितवनमा आयोजना हुने कार्यक्रमलाई सम्बोधन गर्ने जनाइएको छ।