ऐन महर रिहा, श्रीमती थुनामा

काठमाडौं। एमाले नेता ऐन महर एक लाख धरौटीमा छुट्नुभएको छ। विद्युतीय करोबार ऐन, ०६३ को दफा ४७ अन्तर्गतको कसुर गरेको भन्दै महरविरुद्ध जिल्ला अदालत काठमाडौंले एक लाख धरौटी माग गरेको हो।

काठमाडौं जिल्ला अदालतका सूचना अधिकारी दीपक श्रेष्ठले महर एक लाख धरौटी बुझाएर अदालतबाट रिहा भएको जानकारी दिनुभयो। उहाँले भन्नुभयो, ‘महरविरुद्ध एक लाख धरौटी माग भएको छ। रकम बुझाएर उहाँ आजै रिहा हुनुभएको छ। उहाँ आज अदालतमा बयान दिन आउनुभएको थियो। सोही क्रममा उहाँले धरौटी रकम बुझाउनुभएको हो।’

सोही कसुरमा महरकी श्रीमती अनुजा श्रेष्ठलाई भने साइबर ब्युरोबाट खटिएका प्रहरीले पक्राउ गरेको छ। महरदम्पतीविरुद्ध रश्मिला बमले विद्युतीय करोबार ऐन, ०६३ को दफा ४७ अन्तर्गतको कसुरमा साइबर ब्युरोमा जाहेरी दिएकी थिइन्। सोही कसुरमा पक्राउ पुर्जी जारी भएपछि उनीहरू फरार हुनुभएको थियो।

अदालतमा दर्ता भएको सोही मुद्दामा सोमबार पेसी थियो। थुनछेक बहसका क्रममा महरका लागि धरौटी माग भयो। तर, श्रेष्ठको सम्बन्धमा भने बहस नसकिएपछि उनलाई पक्राउ गरिएको ब्युरोका प्रवक्ता एसपी दीपकराज अवस्थीले बताउनुभयो।