परामर्शमा बालेन

काठमाडौं। केहीदिन यता  काठमाडौं महानगरपालिकाका मेयर बालेन शाह आगामी राजनीतिक कदमका विषयमा परामर्शमा हुनुहुन्छ। उहाँ आफू निकट सहित वैकल्पिक राजनीतिको खोजीमा रहेका नेतासँग छलफल गर्दै हुनुहुन्छ। वैकल्पिक दलको नेता मानिने रवि लामिछानेसहितका दलसँग बालेन परामर्शमा हुनुहुन्छ। त्यसो त, आज दिनभर उहाँ परामर्श र छलफलमै रहनुभयो।

बालेन गएरातिदेखि आफ्नो अनुकूलता हुनेगरी टिम निर्माणको छलफलमा व्यस्त हुनुभएको निकट स्रोत बताउँछ । यस्तै व्यस्तताको बीच आज बिहानैदेखि ललितपुरको ज्वागलस्थित बालेनका सहयोगी कुमार बेनको घरमा नेतादेखि कलाकारको भिड बढेको छ ।

आज बिहान मात्रै बालेनले उज्यालो नेपाली पार्टीका नेता कुलमान घिसिङसँग भेट गर्नुभएको छ। रविसँग भन्दा कुलमानसँग सहज हुने गरी टिम निर्माणको छलफलमा बालेन जुट्नुभएको छ।  तर कुलमानसँग भेट सकिएपछि पछिल्लो दुई घण्टायता ज्वागलमा बालेन र राष्ट्रिय स्वतन्त्र पार्टीका सभापति रवि लामिछानेबीच भेटवार्ता चलिसकेको छ।

वार्ता चलिरहँदा कलाकार, नेतादेखि जेन–जी अगुवाको भिड ज्वागलमा बढेको छ । हामी नेपालका सुधन गुरुङ, विघटित प्रतिनिधिसभाका स्वतन्त्र सांसद अमरेशकुमार सिंह, निर्देशक विशाल भण्डारीसहित कलाकार पनि ज्वागल पुग्नुभएको छ।  भित्र वार्ता चलिरहँदा गुरुङ बालेन र रविबीच सम्झौता नभएसम्म बाहिर जान दिँदैनौँ भन्दै तालाबन्दी गरेका थिए । त्यसअघि विघटित प्रतिनिधिसभामा कांग्रेसबाट सांसद बनेका सुनिल शर्मा बालेनलाई भेटेर फर्किनुभएको थियो।

गएराति नै बालेनले ज्वागलमै जनमतका सीके राउत, रेशम चौधरी, राप्रपाका ज्ञानेन्द्र शाही, पूर्व प्रशासक भीम उपाध्याय, पत्रकार ऋषि धमला, सागर ढकाल, भगवान कोइराला, निश्चल बस्नेत, सरोज गौतम र असिम शाहसहितका नेतालाई भेट्नुभएको थियो।