जसपा नेपाल र लोसपाबीच एकता हुने

काठमाडौं। जनता समाजवादी पार्टी (जसपा) नेपाल र लोकतान्त्रिक समाजवादी पार्टी (लोसपा) नेपालले पार्टी एकता गर्ने निर्णय गरेका छन् । आइतबार काठमाडौंमा दुवै दलका अध्यक्ष उपेन्द्र यादव र महन्थ ठाकुरसहित पदाधिकारीहरूको संयुक्त बैठकले एकताको निर्णय गरेको हो ।

बैठकले संघीय लोकतान्त्रिक गणतन्त्रात्मक प्रणालीलाई थप संस्थागत गर्दै संघीयता, पहिचान, समानुपातिक समावेशीता, सामाजिक न्यायलगायत अग्रगामी परिवर्तनका मुद्दाहरूलाई मजबुत बनाउने निष्कर्ष निकालेको छ । साथै, न्यायपूर्ण समाज निर्माणका लागि संयुक्त रूपमा अघि बढ्ने प्रतिबद्धता व्यक्त गरिएको छ ।

दुवै दलले समान विचार, लक्ष्य र राजनीतिक एजेन्डाका आधारमा एकीकृत भएर देशको राजनीतिक स्थायित्व र समावेशी लोकतन्त्र सुदृढ गर्न योगदान पुर्‍याउने विश्वास व्यक्त गरेका छन् ।