पूर्व गृहमन्त्री लेखकले दिनुभयो जेनजी आन्दोलनबारे आयोगमा बयान

काठमाडौं। नेपाली काँग्रेसका नेता तथा तत्कालीन गृहमन्त्री रमेश लेखक गत भदौ २३ र २४ गतेको जेन–जी आन्दोलनका क्रममा भएको घटनाको छानबिन गर्न गठित जाँचबुझ आयोगमा बयान दिनुभएको छ।

सोमबार आयोगमा उपस्थित भएर आफूले लिखित र मौखिक रुपमा आफ्नो धारणा दिएको कांग्रेस नेता समेत रहनुभएका लेखकले बयानपछिको पत्रकार सम्मेलनमा जानकारी दिनुभयो।

पत्रकार सम्मेलनमा उहाँले भन्नुभयो, ‘मैले आयोगका जिज्ञासा, प्रश्न र घटनाका बारेमा मेरो धारणा, जानकारी र विचारहरु प्रस्तुत गरेर आएको छु। मैले आयोगका अध्यक्षलाई सम्बोधन गरेर आयोगमा लिखित रुपमै पनि मेरो बयान बुझाएको छु।‘

उहाँले भाद्र २३ र २४ गतेको आन्दोलनका क्रममा भएका घटनाबारे दु:ख व्यक्त गर्दै जेनजीका माग सम्बोधन हुनुपर्ने बताउनभयो।
पत्रकार सम्मेलनमा उहाँले भाद्र २३ र २४ गतेको घटनाको बारेमा जानकारी दिनुभएको थियो।

आयोगले यसअघि लेखकलाई बयानका लागि बोलाएको थियो । शुरुमा पुस १३ गतेका लागि तोकिएको समयमा विशेष कारणले उपस्थित हुन नसकेपछि लेखक सोमवार दिउँसो आयोगमा पुग्नुभएको हो । गौरीबहादुर कार्की नेतृत्वको यो तीन सदस्यीय आयोगले जेन–जी आन्दोलनका क्रममा प्रहरीको अत्यधिक बल प्रयोग, मानवअधिकार उल्लंघन र भएको क्षतिको छानबिन गरिरहेको छ । आन्दोलनका बेला लेखक गृहमन्त्री हुनुहुन्थ्यो । शान्तिसुरक्षाको जिम्मेवारी उहाँमाथि नै थियो । आयोगले यसअघि विभिन्न सुरक्षा अधिकारी र कर्मचारीहरूको बयान लिइसकेको छ ।