फिल्म `परान´ले गर्यो १७ करोडमाथिको व्यापार

काठमाडौं। नीर शाहको मुख्य भूमिका रहेको फिल्म ‘परान’ ले बक्सअफिसमा १७ करोड ६७ लाख ३६ हजार ग्रस कलेक्सन गरेको छ। चलचित्र विकास बोर्डले सार्वजनिक गरेको बक्सअफिस रिपोर्टअनुसार यस फिल्मले गत शनिबारसम्म यो आकंडा पार गरेको छ।

‘छक्का पञ्जा ४’ को रेकर्ड तोड्दै यो सर्वाधिक कमाइ गर्ने चौथो फिल्म बनिसकेको छ। हालसम्म फिल्मका ६ लाख २७ हजार ५८५ टिकट बिक्री भएका छन्।

दीपकप्रसाद आचार्य (काकु) को डेब्यू निर्देशन रहेको फिल्ममा नीरसहित मदनकृष्ण श्रेष्ठ, पूजा चन्द, महेश त्रिपाठी, अञ्जना बराइली, केकी अधिकारी, प्रवीण खतिवडा, बुद्धि तामाङ, यासेली योङहाङ, बबिन राई, पुष्पराज ओझा, सीमा काफ्ले, दमन रुपाखेती, यमन श्रेष्ठ, सुब्रतराज आचार्य, सुरेश थापा, बिनोद राई र बाल कलाकार आर्यादीप आचार्य लगायतको अभिनय छ।