कांग्रेसमा महाधिवेशनको रडाको ; देउवाले आफूनिकट नेताको राय लिने

काठमाडौं । महामन्त्रीद्वय गगन थापा र विश्वप्रकाश शर्माले विशेष महाधिवेशन बोलाएपछिको अवस्थाबारे छलफल गर्न कांग्रेस सभापति शेरबहादुर देउवाले आफूनिकटका नेतासँग छलफल गर्ने हुनुभएको छ।

आफूनिकटका पदाधिकारी र पूर्वपदाधिकारीलाई देउवाले आइतबार दिउँसो २ बजेका लागि छलफलमा बोलाउनुभएको हो। ‘सभापतिज्यूले छलफलका लागि बोलाउनु भएको छ, पार्टीभित्रको संकटको बारे मै छलफल हुन्छ,’ देउवा निकट एक पदाधिकारीले भने।

शुक्रबारको कार्यसम्पादन समितिको बैठकले वैशाख २८ देखि नियमित महाधिवेशन गर्ने निर्णय गरे पनि गगन–विश्वले विशेष महाधिवेशन नरोक्ने बताउनुभएको हो । उहाँहरुले शनिवार कानूनविद्सँग परामर्श गर्नुभएको थियो।

आफूनिकट पदाधिकारी र पूर्वपदाधिकारीसँग छलफल गरेर देउवाले निकासका लागि प्रयत्न गर्ने ती पदाधिकारीले बताए ।

महामन्त्री थापाले पुस २८ र २९ गतेको विशेष महाधिवेशन नरोकिने त्यसका लागि देउवाले केन्द्रीय समिति राखेर निर्णय गराउनु पर्ने बताउनुभएको थियो ।