सामुदायिक वनका अध्यक्षसहित ४ जनाविरुद्ध भ्रष्टाचार मुद्दा

काठमाडौं। अख्तियार दुरुपयोग अनुसन्धान आयोगले उदयपुरको त्रियुगा नगरपालिकाको सामुदायिक वन उपभोक्ता समूहका अध्यक्ष मीना कुमारी चौधरीसमेत ४ जनाविरुद्ध भ्रष्टाचार मुद्दा दायर गरेको छ ।

सामुदायिक वन उपभोक्ता समितिको कोषको रकमबाट भवन निर्माण लगायतका कार्यमा अनियमितता भएको भन्दै आयोगले मंगलबार चौधरीसमेत ४ जनाविरुद्ध विशेष अदालत काठमाडौंमा मुद्दा दायर गरेको हो ।

वन उपभोक्ता समितिका अध्यक्ष चौधरीसँगै आयोगले सचिव जानकी कुमारी चौधरी, कोषाध्यक्ष निलम चौधरी थारू र दर्तावाल लेखापरीक्षक तनुकलाल चौधरीलाई प्रतिवादी कायम गरेको छ ।

उनीहरू सबै जनाविरुद्ध जनही ५ लाख १५ हजार ३०२ रूपैयाँ बिगो कायम गरिएको आयोगका प्रवक्ता सुरेश न्यौपानेले जनाएका छन् ।