पाकिस्तानमा बस दुर्घटना हुँदा तीन जनाको मृत्यु, १६ घाइते

पूर्वी पाकिस्तानको पञ्जाव प्रान्तमा एउटा यात्रुवाहक बस दुर्घटना हुँदा तीन जनाको मृत्यु भएको छ भने १६ जना गम्भीर घाइते भएका छन् ।

पाकिस्तानको पूर्वी पञ्जाव प्रान्तस्थित तालागाङ जिल्लामा बुधवार यात्रुवाहक बस दुर्घटनामा परेको हो ।

रावलपिण्डीबाट मुल्तानतर्फ जाँदै गरेको उक्त बस पहाडी क्षेत्रको एउटा मोड काट्ने क्रममा अनियन्त्रित भई करिव १०० फिट गहिरो खोंचमा खसेको उद्धार अधिकारीहरूले बताएका छन् ।

घटनास्थलमा पुगेका रेस्क्यु ११२२ का टोली र जिल्ला प्रशासनका कर्मचारीहरूले घाइते तथा मृतकहरूलाई तालागाङस्थित सरकारी अस्पताल पु¥याएका छन् । घाइतेहरूको अहिले उपचार भइरहेको छ भने दुर्घटनाबारे थप अनुसन्धान भइरहेको छ ।