कांग्रेस जिउँदो व्यक्तिहरूको पार्टी हो, कोही `बा´हरूको होइन : गगन थापा

काठमाडौं। नेपाली कांग्रेसका महामन्त्री गगन थापाले आफ्नो पार्टी दास र लासको पाटी नभएको बताउनुभएको छ।

काठमाडौँको भृकुटीमण्डपमा आयोजित विशेष महाधिवेशन उद्घाटन समारोहलाई सम्बोधन गर्दै थापाले कांग्रेसमा जिउँदो मानिसको पार्टी भएको बताउनुभएको हो। ‘कांग्रेस दास र लासहरूको पार्टी होइन, कांग्रेस जिउँदो मानिसको पार्टी हो। यहाँ कोही बा छैन, नबोल भन्ने। यहाँ सबै बराबर छन्,’ थापाले भन्नुभयो।

कांग्रेसभित्र प्रश्न नमरेको उनको भनाइ थियो। ‘यहाँ कोही मालिक, कोही दास छैन, सब बराबर छ,’ उहाँले भन्नुभयो।

आजदेखि कांग्रेसको पुरानो पद्धति भत्किएको उहाँले घोषणा गर्नुभयो। ‘आजबाट भत्कियो, अब कसैले पार्टीको सदस्यलाई हेप्न सक्दैन,’ थापाले भन्नुभयो, `अब तल बसेको सदस्यलाई माथि बसेकाले निहुरिएर नमस्ते गर्नुपर्छ, जय नेपाल गर्नुपर्छ।’