सुदूरपश्चिममा लगानी गर्न मुख्यमन्त्री शाहको आह्वान

कैलाली । सुदूरपश्चिम प्रदेशका मुख्यमन्त्री कमलबहादुर शाहले सुदूरपश्चिममा लगानी भित्र्याउन स्वदेशी तथा विदेशी लगानीकर्तालाई खुला आह्वान गरेका छन् ।

मंगलबार सुदूरपश्चिम औद्योगिक व्यापार मेला तथा टीकापुर महोत्सव–२०८२ को उद्घाटन गर्दै सुदूरपश्चिममा पर्याप्त लगानीका क्षेत्र रहेको उल्लेख गर्दै उनले लगानीका लागि आग्रह गरेका हुन् ।

“प्रदेशको समृद्धिका लागि निजी क्षेत्रको लगानी अपरिहार्य छ,” उनले भने, “यहाँ पर्याप्त लगानीका क्षेत्र छन् । स्वदेशी तथा विदेशी लगानीकर्तालाई लगानी गर्न आह्वान गर्दछु ।”
उनले लगानीमैत्री वातावरण सिर्जना गर्न प्रदेश सरकार प्रतिबद्ध रहेको बताएका थिए । “लगानीकर्तालाई अनुकूल हुने कानुन संशोधन गर्न प्रदेश सरकार तयार रहेको छ,” मुख्यमन्त्रीले भने, “लगानीको सुनिश्चितताका लागि सुरक्षा, खानेपानी र यातायातजस्ता पूर्वाधार विकासको वातावरण बनाउन पनि सरकार तयार छ ।”

मुख्यमन्त्री शाहले मेला–महोत्सवले स्थानीय उत्पादनको प्रवर्द्धन गर्नुका साथै यहाँको कला, संस्कृति र पहिचानलाई अगाडि बढाउने विश्वास व्यक्त गरेका थिए । यस्ता कार्यक्रमले आर्थिक गतिविधि चलायमान बनाउन महत्वपूर्ण भूमिका खेल्ने उनको भनाइ थियो ।

मुख्यमन्त्री शाहले टीकापुरमा छिट्टै टीकापुर प्राविधिक विश्वविद्यालय सञ्चालन गरिने घोषणा गर्दै यसले क्षेत्रको शैक्षिक, आर्थिक तथा समग्र विकासमा ठूलो टेवा पुग्ने विश्वास व्यक्त गरे । यसका लागि सबै जनप्रतिनिधि एकताबद्ध भएर अघि बढ्नुपर्नेमा उनको जोड थियो ।

“औद्योगिक, सांस्कृतिक, शैक्षिक, कृषि एवं पर्यटकीय सम्भावना : समृद्ध सुदूरपश्चिमको परिकल्पना” भन्ने नाराका साथ टीकापुर उद्योग वाणिज्य संघको आयोजनामा सुरु भएको महोत्सव माघ ११ गतेसम्म सञ्चालन हुनेछ ।

टीकापुर उद्योग वाणिज्य संघका अध्यक्ष सन्तोष खड्काको अध्यक्षतामा सम्पन्न उद्घाटन समारोहमा सुदूरपश्चिमको कला संस्कृतिलाई झल्काउने झाँकीहरू प्रस्तुत गरिएका थिए । उद्घाटन सत्रमा बोल्ने वक्ताहरूले टीकापुरको विकास र समृद्धिका लागि सबै एक हुनुपर्ने बताएका थिए ।