देउवालाई प्रस्ताव गरेका ८ बुँदा सार्वजनिक गर्दै विश्वप्रकाशको प्रश्न ; हित हुने शब्द कहाँ थियो?

काठमाडौं। केन्द्रीय समितिले कारबाहीको निर्णय गरेपछि नेपाली कांग्रेसका महामन्त्री विश्वप्रकाश शर्माले सहमतिका लागि अघि सारिएको बुँदा सार्वजनिक गर्नुभएको छ।

उहाँले सहमतिका लागि अघि सारिएका बुँदा उल्लेख गर्दै कुन बुँदा कांग्रेस र देशको अहितमा थियो र छ भन्दै प्रश्न समेत गर्नुभएको हो।

उहाँले अर्का महामन्त्री गगन थापा र आफ्नो मुस्कुराइरहेको तस्वीरसहित सामाजिक सञ्जालमा सहमतिका लागि प्रस्ताव गरिएका बुँदा सार्वजनिक गर्नुभएको छ।

‘मुस्कुराउँदै फेरि पढेँ यी बुँदा,‘मेरो प्रतिक्रिया केवल यत्ति छ- कांग्रेस र देशलाई बदल्ने प्रयासमा गगन थापा र म, दुवै दृढ छौं । विधान अनुरूपको विशेष महाधिवेशनले देशलाई सही दृष्टिकोण दिएको छ, अब सही नेतृत्व दिनेछ’, शर्माले भन्नुभएको छ।

बुधबार बसेको केन्द्रीय कार्यसमिति बैठकले महामन्त्री गगन थापा, शर्मा, सहमहामन्त्री फरमुल्लाह मन्सुरलाई पाँच वर्षका लागि कारबाही गर्ने निर्णय गरेको थियो ।

उक्त निर्णयपछि नेतृत्व चयन गर्न दबाब दिँदै विशेष महाधिवेशनस्थल भृकुटीमण्डपमा नाराबाजी भएको छ ।

सहमतिका लागि आज बिहान प्रस्तावित यी ८ बुँदामध्ये कुन बुँदा काँग्रेस र देशको अहितमा थियो र छ ?

१) बिशेष महाधिवेशनको स्वामित्व साझा रूपमा लिनेे l
२) बिशेष महाधिवेशन परिमार्जन सहित पारित प्रस्तावहरु कार्यान्वयन गर्ने l
३) सभापतिले सक्रिय भुमिका निर्वाह नगर्ने, सो क्रममा उम्मेदवारी पत्रमा सभापतिले हस्ताक्षर नगर्ने
४) उम्मेदवार चयन गर्न संसदीय बोर्ड गठन गर्ने
५) आगामी निर्वाचनमा एक ढिक्का भएर मैदानमा जाने
६) कुनैपनी दलसँग गठबन्धन नगरेर नेपाली काँग्रेसले आगामी निर्वाचनमा एक्लै प्रतिस्पर्धा गर्ने l
७) नेपाली काँग्रेसका तर्फबाट आगामी निर्वाचनमा प्रधानमन्त्रीको उम्मेदवार घोषणा गरेर जाने l
८) यी सबै कार्य समन्वय र कार्यान्वयन गराउन ५ सदस्यीय संरचना गठन गर्ने l जसमा – कार्यवाहक सभापति र दुई महामन्त्री बाहेक थप दुई नेताहरू रहने l

मुस्कुराउँदै फेरि पढें यी बुँदा, मेरो प्रतिक्रिया केवल यत्ति छ- काँग्रेस र देशलाई बदल्ने प्रयासमा गगन थापा र म, दुवै दृढ छौँ l बिधान अनुरूपको बिशेष महाधिवेशनले देशलाई सहि दृष्टिकोण दिएको छ, अब सहि नेतृत्व दिनेछ !