विघटित केन्द्रीय समितिले गरेको कारबाहीको कुनै कानुनी वैधता छैन : पुष्पा भुसाल

काठमाडौं । नेपाली कांग्रेसकी नेतृ पुष्पा भुसालले विशेष महाधिवेशनको पहिलो दिनकै बन्दसत्रले केन्द्रीय कार्यसमिति विघटन गरिसकेको अवस्थामा नेताहरू गगन थापा, विश्वप्रकाश शर्मालागयतमाथि गरिएको कारबाहीको कुनै कानुनी वैधता नरहेको बताउनुभयो।

बुधबार (पुस ३०) विशेष महाधिवेशनस्थल भृकुटीमण्डपमा भुसालले बन्दसत्रबाट केन्द्रीय कार्यसमिति विघटन गर्ने निर्णय सर्वसम्मत रूपमा पारित भइसकेकाले त्यसपछि केन्द्रीय कार्यसमितिले गरेका निर्णय औचित्यहीन भएको तर्क गर्नुभयो।

केन्द्रीय कार्यसमिति विघटन भइसकेको कारण कुनै पनि पदाधिकारीलाई स्पष्टीकरण सोध्ने वा कारबाही गर्ने अधिकार नै नरहने भएकाले गरिएको कारबाहीको कुनै औचित्य नरहेको बताउनुभयो।

बन्दसत्रले पार्टीको नयाँ नीति पारित गर्दै केन्द्रीय कार्यसमिति विघटन गरिसकेको अवस्थामा केन्द्रीय कार्यसमितिको नाममा भए गरेको निर्णयलाई महाधिवेशन प्रतिनिधिहरूले नचिन्ने उहाँको तर्क छ ।

“विशेष महाधिवेशनको पहिलो दिनको बन्दसत्रले केन्द्रीय कार्यसमितिको विघटन गरिसकेको थियो । त्यो निर्णय सर्वसम्मत पारित भएको अवस्था थियो,” भुसालले भन्नुभयो, “विघटन भइसकेको अवस्थामा केन्द्रीय कार्यसमितिले आफ्नो औचित्य गुमाइसकेको स्थितिमा आज भएको कारबाहीको कानुनी वैधता छैन । यो निर्णयलाई महाधिवेशन प्रतिनिधिले चिन्दैन । विधानमा त्यो व्यवस्था पनि छैन ।”

विशेष महाधिवेशनद्वारा नेतृत्व चयन गरेर पार्टी आसन्न निर्वाचनमा होमिने उहाँको भनाइ छ । न्युज एजेन्सी नेपाल