काँग्रेस विभाजन लोकतन्त्रका लागि सुखद होइन : योगेश भट्टराई

काठमाडौँ। नेपाली काँग्रेसको हालको अवस्थालाई लिएर नेकपा एमालेका नेताहरूले चासो व्यक्त गर्नुभएको छ।

विशेष महाधिवेशनबाट गगन थापा पक्षले नयाँ नेतृत्व चयन गरेसँगै काँग्रेस विभाजित भएको छ। निर्वाचन आयोगले थापा पक्षलाई आधिकारिकता दिएसँगै यसले आगामी निर्वाचनमा ठूलो प्रभाव पार्ने विश्लेषण गरिएको छ।

काँग्रेसको हालको स्थितिबारे एमाले उपमहासचिव योगेशकुमार भट्टराईले विभाजनसम्बन्धी विवादलाई कानूनी र लोकतान्त्रिक प्रक्रियाबाट समाधान गर्न सकिने बताउनुभयो।

उहाँले अदालत जान सबै खुला रहेको र अदालतमा आफूलाई ठिक नलागेपछि उजुरी लिएर जान सकिने बताउनुभयो।

उहाँले भन्नुभयो, ‘देश‚ जनता र लोकतन्त्रका लागि अहिलेको अवस्थामा काँग्रेस फुट्नु सुखद होइन।’

एमाले उपाध्यक्ष रघुजी पन्तले काँग्रेसको यो फुटलाई देश, जनता र लोकतन्त्रका लागि नकारात्मक भएको बताउनुभयो। निर्वाचन आयोगले शुक्रवार गगन थापा पक्षलाई पार्टीको आधिकारिकता प्रमाणित गरेको छ।

संस्थापन पक्षले भने निर्वाचन आयोगले एकलौटी रूपमा निर्णय गरेको र आफूहरू सर्वोच्च अदालतमा उजुरी लिएर जाने बताएको छ।