म टिकट वितरणमा सहभागी छैन : पूर्णबहादुर खड्का

काठमाडौं। नेपाली कांग्रेसका नेता पूर्णबहादुर खड्काले आफू टिकट वितरणको प्रक्रियामा सहभागी नभएको प्रस्ट्याउनुभएको छ । सामाजिक सञ्जालमा लेख्दै खड्काले  १ सय ६५ क्षेत्रका निर्वाचन क्षेत्रको टिकट वितरणमा आफू सहभागी नभएको बताउनुभयो।

सामाजिक सञ्जालमा उहाँले लेख्नुभएको छ, ‘नेपाली कांग्रेसको तर्फबाट प्रतिनिधिसभाको १ सय ६५ निर्वाचन क्षेत्रको उम्मेदवारको टिकट वितरणको सम्बन्धमा कुनै पनि बैठक र प्रक्रियामा म सहभागी नभएको र मलाई कुनै पनि जानकारीसमेत नभएको कुरा सबैमा स्पष्ट पार्न चाहान्छु । कसैमा भ्रम नरहोस् ।’

विशेष महाधिवेशनबाट नयाँ कार्यसमिति नआउँदासम्म खड्का कांग्रेसमा कार्यवाहक सभापति हुनुहुन्थ्यो । विशेष महाधिवेशनबाट निर्वाचित केन्द्रीय समितिलाई निर्वाचन आयोगले मान्यता दिएपछि सभापति गगन थापाले टिकट वितरण गरिरहनुभएको छ।

हिमाली र उच्च पहाडी जिल्लाको टिकट वितरण भइरहेको छ । आज रातिसम्म संसदीय बोर्डले केही क्षेत्रबाहेक अन्य क्षेत्रको टिकट टुंग्याउँदै छ ।