भारतीय दूतावासका निमित्त राजदूत डा.राकेश पाण्डेसँग राष्ट्रपतिसँग भेटवार्ता

काठमाडौँ । उपराष्ट्रपति रामसहाय प्रसाद यादवसँग नेपालका लागि भारतीय दूतावासका निमित्त राजदूत डा.राकेश पाण्डेले भेटवार्ता गरेका छन् ।

लैनचौरस्थित उपराष्ट्रपतिको कार्यालयमा बुधबार भएको भेटमा द्विपक्षीय सम्बन्ध, सहयोग तथा अन्य विविध आयामका विषयमा छलफल भएको उपराष्ट्रपतिको सचिवालयले जनाएको छ ।

नेपाल–भारत सम्बन्ध सामाजिक, सांस्कृतिक, धार्मिक, आध्यात्मिक, आर्थिकको क्षेत्रमा रहेको बताउँदै उपराष्ट्रपति यादवले नेपाल–भारत सम्बन्ध आपसी सम्मान एवं विश्वासमा आधारित रहेको बताए ।

नेपालले भारतसँगको सम्बन्धलाई उच्च महत्त्व दिँदै आएको बताउँदै उनले भारत सरकारले ‘नेबरहुड फस्र्ट’ नीतिअन्तर्गत छिमेकीहरूसँगको सम्बन्धलाई विशेष प्राथमिकता दिने नीति अवलम्बन गरेको बताए ।

भारत नेपालको एक महत्त्वपूर्ण विकास साझेदारको रूपमा रहेको बताउँदै उनले आर्थिक तथा प्राविधिकसहित विभिन्न क्षेत्रमा भारतले सहयोग पुर्‍याउँदै आएको बताए ।

निमित्त राजदूत पाण्डेले नेपाललाई भारतले हरेक क्षेत्रमा सहयोग गर्न तत्पर रहेको बताए । विशेषगरी खेलकुदको क्षेत्र, विशेषतः क्रिकेटमा सहयोग गर्न भारत इच्छुक रहेको उल्लेख गर्दै उनले नेपालका रेलवे क्षेत्रमा समेत सक्दो सहयोग गर्न भारत तयार रहेको बताएका थिए ।