उत्तर–पश्चिम पाकिस्तानमा वैवाहिक समारोहमा आत्मघाती विष्फोट, ५ जनाको मृत्यु

पाकिस्तानको उत्तर–पश्चिम खैबर पख्तुनख्वा प्रान्तको डेरा इस्माइल खान जिल्लामा एक वैवाहिक समारोहमा भएको आत्मघाती विष्फोटमा परी कम्तीमा पाँच जनाको मृत्यु भएको छ भने १० जना घाइते भएका छन् ।

जिल्ला प्रहरी अधिकारी सज्जाद अहमद साहिबजादाकाअनुसार जिल्लाको कुरेशी मोर क्षेत्रमा रहेको एक घरमा विवाहको अवसरमा सांगीतिक कार्यक्रम भइरहेका बेला आत्मघाती आक्रमणकारीले विस्फोटक पदार्थले भरिएको ज्याकेट विष्फोट गराएका थिए ।

विष्फोटमा घाइते भएकामध्ये केहीको अवस्था गम्भीर रहेकाले मृतकको संख्या अझै बढ्नसक्ने अधिकारीहरूले चिन्ता व्यक्त गरेका छन् । यस भीषण आक्रमणको जिम्मेवारी अहिलेसम्म कुनै पनि समूहले लिएको छैन । सुरक्षाकर्मीहरूले घटनास्थललाई घेरा हाली अनुसन्धान शुरु गरेका छन् ।