कोशी प्रदेशमा राष्ट्रिय सभा सदस्य निर्वाचनको मतदान शुरु

काठमाडौँ। राष्ट्रिय सभाका रिक्त हुन लागेका सदस्य पदहरूका लागि सातै प्रदेशमा मतदान शुरु भएको छ ।  कोशी प्रदेशमा पनि बिहान ९ बजेदेखि मतदान प्रक्रिया शुरु भएको प्रदेश निर्वाचन कार्यालय विराटनगरले जनाएको छ । राष्ट्रिय सभामा आगामी फागुन २० गतेदेखि रिक्त हुने १८ पदमध्ये कोशी प्रदेशको खस आर्य समूहअन्तर्गत एक पदमा नेपाली कांग्रेसका उम्मेदवार सुनिलबहादुर थापा निर्विरोध निर्वाचित भइसक्नुभएको छ ।

बाँकी दुई पद (महिला र दलित समूह) का लागि कोशी प्रदेशमा मतदान भइरहेको छ । कोशी प्रदेशको मतदान स्थल प्रदेश निर्वाचन कार्यालय परिसर, विराटनगर (मोरङ) मा तोकिएको छ । मतदान बिहान ९ बजेदेखि दिउँसो ३ बजेसम्म चल्नेछ । मतदानमा प्रदेशसभा सदस्य तथा स्थानीय तहका जनप्रतिनिधिहरू सहभागी छन् । देशभर १७ पदका लागि ४४ जना उम्मेदवारहरू प्रतिष्पर्धामा छन् । –न्युज एजेन्सी नेपाल