चीनसँग व्यापार सम्झौता अघि बढाए क्यानडामाथि कडा कर लगाउने ट्रम्पको चेतावनी

न्यूयोर्क। अमेरिकी राष्ट्रपति डोनाल्ड ट्रम्पले चीनसँग व्यापार सम्झौता अघि बढाए क्यानडामाथि कडा कर लगाउने चेतावनी दिएका छन्।

सामाजिक सञ्जालमार्फत ट्रम्पले क्यानडाले चीनबाट आउने सामान अमेरिकामा पठाउने केन्द्र बन्न खोजे त्यसलाई स्वीकार नहुने बताएका छन्। यद्यपि क्यानडाले एक साताअघि नै चीनसँग नयाँ व्यापार सम्झौता गरिसकेको छ।

यसको जवाफमा क्यानडाका प्रधानमन्त्री मार्क कार्नेले स्वदेशी सामान प्रयोग गर्न क्यानडेलीहरूलाई आह्वान गरेका छन्। विदेशी दबाबबीच क्यानडाले आफूले नियन्त्रण गर्न सक्ने कुरामा केन्द्रित हुनुपर्ने उनको भनाइ छ।

ट्रम्प दोस्रो कार्यकालमा आएपछि क्यानडामाथि भन्सार शुल्क बढाएपछि क्यानडाले व्यापार विविधीकरणको बाटो रोज्दै चीनसँग सम्बन्ध सुधार गरेको हो। नयाँ सम्झौताअनुसार दुवै देशले एक–अर्काका वस्तुमा कर घटाएका छन्।

डाभोसमा ट्रम्प र कार्नेबीच चलेको जुहारीपछि ट्रम्प अझ आक्रामक बनेका छन्। उनले कार्नेलाई ‘गभर्नर’ भनेर सम्बोधन गर्दै क्यानडाको सार्वभौमसत्तामाथि प्रश्न उठाएका छन्।

विश्लेषकहरू भन्छन्  ट्रम्पको दबाबबीच कार्ने अमेरिका सामना गर्न सक्ने नेताका रूपमा उदाइरहेका छन्।