पश्चिम अफ्रिका र सहेल क्षेत्रमा बढ्दो आतंकवादी हमलाप्रति घानाका विदेशमन्त्रीको चेतावनी

घानाका विदेशमन्त्री स्यामुएल ओकुजेटो अब्लाक्वाले पश्चिम अफ्रिका र सहेल क्षेत्रमा बढ्दो आतंकवादी घटनाप्रति गहिरो चिन्ता व्यक्त गर्नुभएको छ।

क्षेत्रीय सहयोग र सुरक्षा सम्बन्धी दुई दिने उच्चस्तरीय परामर्श सम्मेलनको उद्घाटनका क्रममा अब्लाक्वाले यस क्षेत्रमा आतंकवादी हमलाका कारण दैनिक औसत ४४ जनाले ज्यान गुमाउने गरेको चेतावनी दिनुभयो।

मन्त्रीकाअनुसार विगत १५ वर्षमा आतंकवादी हमलामा १ हजार २ सय ६६ प्रतिशतले वृद्धि भएको छ भने सोही अवधिमा मृत्यु हुनेको संख्या २ हजार ८ सय ६० प्रतिशतले बढेको छ।

आतंकवादसँगै गिनीको खाडीमा हुने समुन्द्री डकैती र खुल्ला सिमानाबाट हुने मानव तस्करीले सामुदायिक लचिलोपनलाई कमजोर बनाउँदै लगेको उहाँले बताउनुभयो।

अब्लाक्वाले खण्डिकरण, आशंका र सीमित सूचना आदानप्रदानले साझा समस्याहरू समाधान गर्ने क्षेत्रीय सामूहिक क्षमतालाई घटाउने तर्क गर्दै पारदर्शीता र कार्यमुखी सूचना आदानप्रदानको नयाँ संस्कृति निर्माण गर्न आह्वान गर्नुभयो। घानाका गृहमन्त्री मुन्ताका मोहम्मद–मुबारकले पनि आतंकवाद र हिंसात्मक अतिवाद चिन्ताजनक रूपमा परिष्कृत हुँदै विस्तार भएको बताउनुभयो ।

उहाँले सुरक्षा र गुप्तचर प्रमुखहरूलाई यी खतराहरू समाधान गर्न र आफ्ना देशवासीहरूलाई अस्तित्वको संकटबाट जोगाउन आग्रह गर्नुभयो । गृहमन्त्री मुबारकले सुरक्षा चुनौतीहरू संरचनात्मक कमजोरी, जलवायुजन्य तनाव, स्रोतको अभाव र खाद्य असुरक्षासँग गहिरो रूपमा जोडिएको उल्लेख गर्नुभयो ।