इजिप्टमा गजाका घाइते र बिरामी प्यालेस्टिनीहरूको भर्ना शुरु

गजा पट्टीबाट घाइते र बिरामी प्यालेस्टिनीहरूको पहिलो समूह इजिप्ट प्रवेश गरेको छ । जसले गजा युद्धविरामको दोस्रो चरणको एक महत्वपूर्ण कदमलाई संकेत गर्दछ । प्यालेस्टिनी स्रोतहरूका अनुसार ५ जना बिरामी र उनीहरूका १० जना आफन्त वा हेरचाहकर्ताहरूलाई उपचारका लागि दक्षिणी गजाबाट इजिप्ट लगिएको छ ।

यो सम्झौताले दुवैतर्फको आवागमनलाई सहज बनाए पनि इजिप्टबाट गजातर्फ भने अहिलेसम्म कुनैपनि प्यालेस्टिनी प्रवेश गरेका छैनन् । सामाजिक सञ्जालमा देखिएका फुटेजहरूमा बिरामीहरू बोकेका पहेँला एम्बुलेन्सहरूको ताँतीले सीमा पार गरिरहेको देखिएको छ । इजिप्टको सरकारी सञ्चारमाध्यम अल–काहेरा न्युजले सरकारी अधिकारीहरूलाई उद्धृत गर्दै यस स्थानान्तरणको पुष्टि गरेको छ र अधिकारीहरूले सहज आवागमन सुनिश्चित गर्न लजिस्टिक तयारीहरू पूरा गरेको बताएका छन् ।

इजिप्टको उत्तरी सिनाईमा अवस्थित एल आरिसका अस्पतालहरूलाई उच्च शतर्कतामा राखिएको छ । यो आवागमन राफाह नाका आंशिक रूपमा पुनः खुलेपछि भएको हो । जुन इजरायलको नियन्त्रणमा नरहेको गजाको बाह्य संसारसँगको एक मात्र नाका हो । मे २०२४ मा इजरायली सेनाले सीमाको प्यालेस्टिनी पक्ष कब्जा गरेपछि यो नाका प्रायः बन्द रहेको थियो । जसले गजाका २३ लाख बासिन्दाहरूको मानवीय संकटलाई थप गहिरो बनाएको थियो ।

अमेरिकाको मध्यस्थतामा भएको गजा युद्धविरामको दोस्रो चरणका शर्तहरूअनुसार सोमबार कार्य सञ्चालन विस्तार गर्नुअघि आइतबार यो नाका परीक्षणका रूपमा खोलिएको थियो । हालको व्यवस्था अनुसार दैनिक करिब १५० प्यालेस्टिनीलाई गजाबाट बाहिरिन र ५० जनासम्म प्यालेस्टिनीलाई इजिप्टबाट गजा प्रवेश गर्न अनुमति दिइएको छ ।

यो नाका पुनः खुल्नुलाई युद्धविरामको स्थिरताको संकेतको रूपमा हेरिएको छ । १८ महिनाभन्दा लामो समयको पूर्ण एक्लोपनबाट थकित जनसंख्यालाई यस पहुँचले व्यापक मानवीय सहायता पु¥याउने र राहत दिने मध्यस्थकर्ताहरूको आशा छ ।