इरानको अमेरिकालाई चेतावनीः सानो गल्तीले क्षेत्रीय युद्ध निम्त्याउँछ

इरानका शिर्षजनरलले अमेरिकाले गर्ने सानो गल्तीको प्रतिक्रियाले क्षेत्रीय युद्ध निम्त्याउने चेतावनी दिनुभएको छ । आधिकारिक समाचार एजेन्सी इरनाकाअनुसार इरानी सशस्त्र बलका चिफ अफ स्टाफ अब्दोलरहीम मुसावीले एक सैन्य इकाइको भ्रमणका क्रममा पश्चिम एशियामा भइरहेको अमेरिकी सैन्य तैनाथीको जवाफमा सो टिप्पणी गर्नुभएको हो ।

अमेरिकी नौसैनिक नाकाबन्दीको सम्भावनाबारे बोल्दै उनले इरानलाई नाकाबन्दी गर्न नसकिने बताउनु भयो । यसअघि अमेरिकी राष्ट्रपति डोनाल्ड ट्रम्पले विमानवाहक युद्धपोत अब्राहम लिंकनको नेतृत्वमा विशाल सैन्य समूह इरानतर्फ बढिरहेको र तेहरानलाई सम्झौताका लागि समय घर्किदै गएको चेतावनी दिनुभएको थियो ।

इरानी सर्वोच्च नेता अली खामेनीले पनि अमेरिकाले युद्ध शुरु गरेमा त्यो क्षेत्रीय स्तरमा फैलिने बताउनुभएको छ । उहाँका वरिष्ठ सल्लाहकार अली शामखानीले जुनसुकै तहको अमेरिकी सैन्य कारबाहीलाई युद्धको घोषणा मानिने र त्यसको तत्काल तथा अभूतपूर्व जवाफ दिइने स्पष्ट पार्नुभयो ।