दक्षिण लेबनानमा इजरायली हवाई आक्रमणः एकको मृत्यु, आठ घाइते

लेबनानको स्वास्थ्य मन्त्रालयकाअनुसार सोमवार दक्षिण लेबनानमा भएका दुई छुट्टाछुट्टै इजरायली हवाई आक्रमणमा एक जनाको मृत्यु हुनुका साथै अन्य आठ जना घाइते भएका छन् ।

अन्सारीय क्षेत्रमा एक सवारी साधनलाई लक्षित गरी गरिएको आक्रमणमा एकको मृत्यु र चार जना घाइते भएका छन् भने टायर जिल्लामा अर्को कारमा भएको आक्रमणमा थप चार जना घाइते भएका छन् ।

यसअघि इजरायली सेनाका प्रवक्ता अविचाय अद्राईले सामाजिक सञ्जाल एक्समार्फत दक्षिण लेबनानका कफर टेब्निट र ऐन काना गाउँका बासिन्दाहरूलाई तत्काल सुरक्षित स्थानमा जान चेतावनी दिँदै हिजबुल्लाहको सैन्य पूर्वाधारमा आक्रमण गर्ने धम्की दिएका थिए । इजरायली सेनाले पछि एक विज्ञप्ति जारी गर्दै हिजबुल्लाहले पुनः शक्ति सञ्चय गर्ने प्रयासलाई रोक्नका लागि उसका धेरै हतियार भण्डारण केन्द्रहरूमा आक्रमण गरिएको जनाएको छ ।

अन्सारीयमा भएको आक्रमणका बारेमा इजरायली सेनाले यो कारबाही युद्धविराम सम्झौताको उल्लङ्घनको प्रतिक्रिया स्वरूप गरिएको र मारिएका व्यक्ति हिजबुल्लाहको सैन्य पूर्वाधार पुनःस्थापना गर्ने प्रयासमा संलग्न रहेको दाबी गरेको छ ।

सन् २०२४ नोभेम्बर २७ देखि लागू भएको युद्धविरामका बावजुद इजरायली सेनाले हिजबुल्लाहका खतराहरू हटाउने भन्दै लेबनानमा बारम्बार आक्रमण गर्दै आएको छ ।