सन् २०१२ को बेनघाजी आक्रमणका प्रमुख सहभागी पक्राउ

अमेरिकी महान्यायाधिवक्ता पाम बोन्डीले सन् २०१२ मा लिबियाको बेनघाजीस्थित अमेरिकी वाणिज्य दुतावासमा भएको आक्रमणका प्रमुख सहभागीमध्ये एकलाई संघीय अनुसन्धान ब्युरो ९एफबीआई० ले पक्राउ गरेको घोषणा गर्नुभएको छ । सो आक्रमणमा तत्कालीन अमेरिकी राजदुत क्रिस्टोफर स्टिभेन्ससहित चार अमेरिकी नागरिकको मृत्यु भएको थियो ।

महान्यायाधिवक्ताकाअनुसार संदिग्ध व्यक्तिलाई सुपुर्दगी गरी शुक्रवार बिहान मेरील्याण्डको जोइन्ट बेस एन्ड्रुजमा लगिएको छ । उनीमाथि हत्या, आतंकवाद र आगजनीसँग सम्बन्धित आरोपहरूमा मुद्दा चलाइनेछ । सन् २०१२ सेप्टेम्बर ११ मा अल–कायदासँग आवद्ध अन्सार अल–शरिया नामक लडाकू समूहले बेनघाजीस्थित अमेरिकी नियोगमा आक्रमण गरेको थियो । जसमा राजदूत र अन्य तीन अमेरिकी अधिकारीको ज्यान गएको थियो ।

यसअघि पनि दुई अन्य संदिग्धहरू पक्राउ परिसकेका छन् र उनीहरूमाथि आक्रमणमा संलग्न भएको आरोपमा अमेरिकामा मुद्दा चलाइएको छ । तत्कालीन विदेशमन्त्री हिलारी क्लिन्टनको कार्यकालमा भएको यो बेनघाजी आक्रमण सन् २०१६ को अमेरिकी राष्ट्रपति निर्वाचनमा एक महत्वपूर्ण मुद्दा बनेको थियो । क्लिन्टनको कार्यसम्पादन र उम्मेदवारको रूपमा उनको विश्वसनीयतामाथि राजनीतिक रूपमा आलोचना गर्न यस घटनालाई प्रयोग गरिएको थियो ।